Riot : Gaji minimum RM1200 ngerugi pengaji ba Sabah, S’wak
MIRI: Pengaji di Sarawak enggau Sabah ulih bankrap tauka rugi besai nyema dipinta meri gaji abis mit RM1200 sebaka enggau gaji pekereja di Semenanjung Malaysia.
Menteri Penguasa Pengereja Pengawa, Dato Sri Richard Riot Jaem madahka pengaji ditemu agi ba tikas ‘enda tetangkupka’ mayar gaji nitihka penyampau nya beratika kuasa orang gawa enggau untung ke diulih.
“Nyema gaji di Semenanjung disebela di Sarawak enggau Sabah, mayuh pengaji di Sabah enggau Sarawak enda tebayarka gaji. Tebal agi pengaji deka bankrap,” ku iya nyemetak.
Penerang tu disebut lebuh iya nyaut tanya pasal bida gaji abis mit rambau Program Jelajah TN50 begulai enggau 300 pelatih enggau pekereja biak di ILP Miri kemari.
Nitih ku Riot, pemutus pasal gaji abis mit di baruh Akta Gaji Minimum nengah Majlis Gaji Minimum Negara ke mega beratika pekara belanja idup enggau penengkeman tikas gaji ulih dibayar pengaji.
Ku iya, gaji abis mit di Sabah enggau Sarawak niki tinggi agi enti dibanding Semenanjung iya nya RM800 ngagai RM920, iya nya niki RM120.
Di Semenanjung, peniki gaji abis mit iya nya ari RM920 ngagai RM120.
Beratika pekara belanja idup majak tinggi, opis menteri deka nentuka takah tikas gaji ulih dikurang sereta gawa ngambi disebela. KUCHING: Pemutus meri seiti pangku pengawa direktor dalam Petroleum Sarawak Berhad(Petros) ngagai Bumiputera ukai Islam ukai digaga ketegal jaku ansak ari mensia mayuh ba media rama.
Menteri Muda ba Opis Kepala Menteri( Pekara Korporat), Abdullah Saidol madah pekara nya sigi udah dulu diperambu tang bedau diputus ketegal mengkang bedau tetemuka chalun.
‘Atur ngungkupka seiti penuduk direktor dalam Petros ngagai seiku Bumiputera ukai Islam sigi udah lama diperambu, sebedau nama diretor bukai dipansut.
“Tang ba maya nya, Kepala Menteri mengkang nganti saut ari sekeda chalun ke dipilih nyadi direktor kelebih agi sida ti deka ngarika Bumiputera ukai Islam,”ku Abdullah.
Iya mansutka jaku nya ngagai pemberita rambau ngulu program Bejadi Digital Innovation Hub ditu, kemari.
Pengawa dipenyadi Kepala Menteri Datuk Amar Abang Johari Tun Openg.
Ba sebengkah pengerami ke diatur malam Hari Enam tu tadi, Sapit Kepala Menteri Datuk Amar Douglas Uggah madah seiku Bumiputera ukai Islam deka dpilih nyadi kaban diretor dalam Petros nambah empat iku ke udah dulu dipilih.
Ngenang kaul ke sama, Abdullah ngasai jaku ke dipansut Uggah maya nya udah salah dipereti mensia mayuh.
“Aku enda madah Datuk Amar Douglas salah, aku ngasai sekeda orang enda meretika pekara ke disebut iya.
“Tang ketegal jaku iya(Uggah) nya, sekeda orang nyimpul jaku nya baka ke pemutus digaga ketegal ansak mensia mayuh ba media rama,”ku Abdullah nambah.
Enda, pekara tu enda amat. Iya sigi udah bisi rintai chalun tang mengkang nganti saut ari sida aja, tandu Abdullah.
Kena Hari Lima tu tadi, Abang Johari udah mantaika nama chairman Petros enggau kaban direktor.
Abang Johari nengah surat penerang berita nya nyiri Tan Sri Datuk Amar Hamid Bugo nyadi chairman Petros lalu nyiri empat kaban direktor iya nya Dato Muhammad Medan Abdullah, Sharbini Suhaili, Zuraimi Sabki enggau Heng Hock Cheng.
Kelimpah ari nya, Petros mega benung ngiga orang ngisi pangku pengawa Ketuai Pemesai Eksekutif(CEO) Petros. KUCHING : Chalun Parti Rayat Bersatu (UPP) ungkup sitak Parlimen Lanang Andrew Ting Kee Nguan ngembuan ulah ketuai ti dikeingin rayat.
Pekara tu diaku Ketuai Bumiputera UPP Lanang Sobri Sandom rambau iya begulai enggau Andrew ngelawa sekeda rumah panjai Iban di sitak nya apin lama ke udah.
Kenu ku Sobri, tiap kali sida niki rumah panjai sambut ari mensia mayuh ngagai sida chukup rami.
“Kebendar tu berindik ari kelai sukung sereta pengeran rayat ditu ti dekaka Andrew dipilih ngarika Barisan Nasional (BN) maya pengawa bepilih ke deka datai.
“Entara timbal ari mensia mayuh mega madahka sida randaka Andrew ulih mai pemansang ngagai sitak Lanang ti udah rugi sekumbang dipegai penyakal.
“Rayat ditu mayuh sebana laban DAP nadai ngembuan pengeransing deka nulung rayat sereta semina bejaku puang.
“Nya kebuah Langgur Pemansang Sibu 1.0 ke dilangkar ke pemaik rayat chukup eng- keman ungkup rayat ke diau ba mengeri enggau menua pesisir,” ku Sobri.