Tetiap JKKK patut nyediaka profil genturung pendiau
Ngambi ulih nyadi malin sereta ngemuntangka pengawa ejensi perintah ti bekaul, ku Mong
SRI AMAN: Genap Komiti Pemansang Enggau Pengelikun Genturung Pendiau (JKKK) di bagi menua tu seruran ditangkan nyediaka profil genturung pendiau sida empu nyadika chuan bala kaban JKKK sereta ejensi perintah bekaul.
Kaban Kunsil Nengeri ( ADUN) Bukit Begunan Datuk Mong Dagang madah tuju pengawa nyediaka profil genturung pendiau ukai ditaruh tang patut dianjung ngagai Opis Residen di renggat bagi menua lalu Opis Pelilih di renggat pelilih.
“Profil genturung pendiau tu ukai semina diguna Opis Residen tauka Opis Pelilih aja, tang mega ejensi bukai ti begunaka dokumen nya nyadika lalau ejensi sida empu.
“Nya alai kitai patut ngingatka tetiap tuai rumah, ketuai genturung pendiau tauka chairman JKKK patut bekerejasama sereta berandau begulai nembuka dokumen tu,” ku iya.
Iya mansutka jaku nya lebuh bejaku bejadika Pengerami Makai Lemai nyerumba ngintu Genap Taun ke-10 JKKK Rumah Siti Amid, Jumbit,
Datuk Mong Dagang ADUN Bukit Begunan
Melugu Skim, Sri Aman di Dewan Suarah semak ditu, ujung minggu tu tadi.
Berebak enggau nya, iya mega nangkan tetiap ketuai raban bansa ditu terus bejalaika tanggungpengawa ngemansangka genturung pendiau enggau rumah panjai sida.
Ku iya, ketuai raban bansa ti mangku pengawa nyadi temenggong, pemancha, penghulu, tuai rumah enggau ke bukai patut gawa ngagai tetiap genturung pendiau begulai enggau bala ketuai di nengeri tu, kelimpah ari suah agi ngatur aum begulai enggau nembiak redak sida.
“Nengah aum ke diatur deka ngemuntangka semua atur pengawa enggau perambu pemansang,” ku iya.
Ku iya, nengah randau begulai enggau bala ketuai di rumah panjai, semua penerang bekaul pemansang enggau penanggul ditapi ulih ditemu.
Tambah mega ku iya, bala ketuai patut nyingkang begulai bejalaika polisi perintah ke alai sida patut nemu sereta meretika pekara ti nyadi kemaya hari nentuka tetiap perambu perintah deka nerima kerejasama sereta mujur.
“Kitai enggaika perambu perintah ungkup sesebuah menua tejanggal tauka diambi pulai baru laban enda nerima sukung ari peranak rumah panjai tauka peranak dataika sida napi pengerugi.
“Nyadi ketuai, kitai patut ngena awak diri nentuka perambu kitai mujur,” ku iya nerang silik.
Nya alai, iya mega ngelalau sereta ngarapka semua ketuai di menua nya ulih nentuka nembiak redak sida nyukung perintah enggau bala ketuai ke bisi ngambika semua projek pemansang ti diperambu deka ulih bejalai enggau lanchar sereta nitihka atur.
Ba lansa ke bukai, iya mega ngingatka Biro Indu seruran nyingkang begulai enggau JKKK.
Ku iya, enti nadai sukung ari komiti Biro Indu, JKKK nadai ulih ngereja semua pengawa di rumah panjai, nya kebuah sida meseti gawa begulai.
“Meseti bisi kerejasama rat antara kededua piak. Nyema JKKK ngatur program, Biro Indu patut mantu pangan diri,” ku iya nambah.
Berindik ari nya, kerejasama rat kededua piak ti ngasuh rumah panjai nya ulih mansang ke mua,” ku iya nyemetak.
Sama bisi datai Pemesai Opis Pekara Khas (JASA) Sarawak DUN Bukit Begunan Jesi Bintoh, Kunsilor Menjang Niah, Kunsilor Tuai Rumah Noria Ampat, Kunsilor Tuai Rumah Riji Gue, Kunsilor Selimin Kring, Kunsilor Atal sereta bala ketuai raban bansa ke bukai.