Penerang silik pasal GST tau diambi terus ari Opis Kastam
MIRI: Opis Kastam Sarawak ngansak kompeni ti berejista di baruh Chukai Barang enggau Servis ( GST) ngulihka penerang ti betul sereta silik ari ejensi nya.
Direktor Kastam Sarawak, Datin Sharifah Halimah Tuanku Taha madahka pengawa ngulihka penerang bekaul GST ari piak bukai semina deka ngasuh kompeni nya napi penanggul.
“Bisi penerang ti diterima ari piak bukai enda betul sereta semina deka ngasuh kompeni nya napi penanggul, nya alai, sida patut datai ngagai kami,” ku iya lebuh bejadika Seminar Audit GST diatur Serakup Pemesai Kanan Kastam Sarawak (PERKASA) kemari.
Halimah madahka kompeni nya mega patut nitihka semua atur GST sereta bekaul enggau pemesai kastam kelebih agi ba pen- gawa nyimpan rekod GST di kompeni sida.
“Nyema bisi sebarang panggul tauka isu bekaul enggau GST, piak kami deka mantu kelebih agi ba pekara akaun enggau perkara chukai GST nitihka undang-undang,” ku iya nyemetak.
Ngelansa silik, Halimah ngarapka 177 iku pesereta ngarika kompeni di Wilayah Utara bulih pemaik ari seminar dikena mantaika sebarang isu bekaul GST.
“Meseti dikeingat kita nyadi ejen, wang bayar GST datai ari rayat, nya alai kita nadai hak nyimpan sereta patut nyuaka ngagai perintah,” tandu iya.
Ku iya, kompeni patut meretika tanggungpengawa sida nyuaka Penyata GST 0.3 di baruh Seksyen 41 Akta Cukai GST ngagai perintah.
“Semua pedagang ti puntan deka ditinggang atur terit ari sukut auditan semua tauka pansik enggau kastam deka ngeluarka notis nuntut pulai baru chukai nya,” ku iya.
Berebak enggau nya, kastam mega deka bejalaika pengawa ngetanka akaun tauka ngetuka kompeni enggau pedagang ti nyimpan chukai tauka ngumpul GST tang enda nyuaka nya ngagai perintah.
Ku iya, pemuntan kompeni nganjung Penyata GST 0.3 ngujungka kompeni nya deka ditinggang penalti ba GST laban laun dibayar.
“Kitai ngarapka kompeni tu nitihka atur sereta bekerejasama enggau kastam ngambika duit GST ulih dipejalai enggau manah nadai sebarang penanggul,” ku iya.
Sama bisi datai Presiden PERKASA Sarawak, Yussuf Drahman sereta bala pemesai kastam Sarawak.