ILP, ADTEC endang engkeman endur nyambung pelajar
MIRI: Milih nampung pelajar di Institut Latihan Perindustrian (ILP) enggau Pusat Latihan Teknologi Tinggi (ADTEC) ukai pengilap tang pemutus ti betul.
Menteri Orang Gawa Dato Sri Richard Riot Jaem madah, bisi makit gawa ungkup bala graduet ari palan latih pengelandik nerima pekereja begaji tinggi mega muntang agi dibanding enggau graduet universiti.
“Nyadi Kaban Parlimen ( MP), kitai meda, nadai kurang ( dipelaba) ari 50 graduet ti udah nganti lama (bulih kereja). Bisi sekeda sida nganti dataika lima taun lalu dataika sehari tu bedau teulihka kereja,” ku iya nerang.
Tang graduet ILP, dalam timpuh 18 bulan bekereja ulih nerima gaji manggai RM3,000.
Bisi mega graduet ILP enggau ADTEC nerima gaji bekereja di menua luar manggai RM40,000 sebulan.
Richard mansutka pekara tu lebuhka betemu enggau lebih 300 pelatih ILP Miri, Kota Samarahan, ADTEC Bintulu, Institut Teknologi Riam enggau bala pekereja biak rambau randau Transformasi Nasional 2050 (TN50) di ILP Miri kemari.
Ngelansa silik, MP Serian madah, nitihka statistik bisi makit gawa lepasan universiti semina 63 peratus, 30 peratus baruh agi ari ILP enggau ADTEC.
“Minggu nyin tadi, aku nyaut di Parlimen, statistik tu betul, 93 peratus ari lepasan ILP enggau ADTEC bulih kereja dalam timpuh enam bulan,” ku iya.
Ku iya nambah, di ILP Miri, bisi makit gawa expelatih bulih kereja lebih 80 peratus.
Senentang randau kemari, iya meri awak ngagai raban nembiak bekunsika juluk sida nyadika lalau enggau kuing Opis Menteri Orang Gawa (KSM) enggau perintah.
Randau nya bejuraika dua batang pekara besai iya nya pelajar pengelandik enggau kereja.
“Juluk kita deka digempung. Tu deka nyadi pelasar tauka tiang ba pengawa ngenegapka TN50 sereta ngemansangka Malaysia nyadi menua mansang datai ba taun 2020 enggau 2050,” ku iya.
Sama bisi datai Ketuai Sekretari KSM, Dato Sri Adenan Abdul Rahman, Sapit Ketuai Sekretari (Operasyen) KSM, Dato Mohamed Elias Abu Bakar, Sapit Ketuai Sekretari (Polisi) KSM, Amir Omar enggau Direktor ILP Miri Dr Rosnah Muhammad Tahir.