Menua Utara S’wak ngembuan mayuh produk dagang temuai menua pesisir
MIRI: Ari sukut dagang temuai menua pesisir, seiku deriba trek, Chua Eng Hin setujuka bagi menua Utara Sarawak bisi mayuh produk ti dikembuan.
Diberekat enggau bemacham rampa menua asal ti manah dalam rampa ti bebida, ku Chua, bagi menua utara nengeri tu mungkur empat sitak parlimen iya nya Miri, Sibuti, Limbang, Lawas enggau Baram ti engkeman endar enggau pengawa dagang temuai Main Asal, Rampa Menua enggau Pejalai Matau Menua (CAN).
Ex-orang dagang temuai, 64 taun, ari Limbang pechaya pengeraja tu nyema dikena memanah, deka ulih mantu perintah Sarawak nyapai juluk nempa industri dagang temuai enggau servis nyadi injin ba pengerembai ekonomi ba nengeri tu.
Tang penanggul kurang infrastruktur pemun baka sambung jalai seruran nyadi isu ti nekul orang dagang menua pesisir ba pengawa dagang temuai sida.
Taja pia, iya enda ngasuh orang dagang ngetu ari neruska pengawa ngelakuka dagang temuai ti udah dipunka sida.
Nya alai, orang dagang bekenaka media rama ngelakuka produk enggau servis dagang temuai sida empu.
Chara alternatif ba pengawa ngelakuka palan dagang temuai enggau bekunsika gambar dalam media rama, ku iya, tu udah ngayanka timbal ti chukup manah ngagai pengawa ngelakuka dagang temuais sida.
Pinchin ari dagang temuai lebih ari 10 taun ke udah, Chua endang meruan dikelala peranak Limbang nyadi duta malin temuai menua nya.
Semangat tinggi ba bidang dagang temuai, pangku pen- gawa iya lebuh nya ngiga palan di bagi menua nya ti ulih matak temuai datai.
Dalam taun 1996, iya ngaul diri ba pejalai matau ngagai Bukit Buda di Limbang, orang ti nyediaka pemakai ungkup sida ti gawa ngatur perengka pengangkut enggau servis komunikasyen di baruh ejensi temuai di Miri.
“Seiti aja sambung jalai ngagai menua nya, bedarat. Pengawa ti mar endar lebuh nadai rentayan arus penyambung rambau pejalai nya.
“Dikena nyaga pengelikun bala pesereta pejalai, kitai endang seruran nyikap diri enggau entukar 4x4 (4WD) di taba kem, nyema bisi sebarang kes ngenyit nyadi.”
Iya nyukung pengawa dipejalaika Kepala Menteri Datuk Amar Abang Johari Tun Openg diatu ti ngansak Sarawak ngagai ekonomi digital ti deka nyambung nengeri tu enggau dunya luar nengah e-dagang.
“Pemar ditapi dalam taun 90an enggau pengurang infrastruktur arus penyambung. Taja pia, enggau pemisi media rama, telefon pintar ti udah ngemai takah komunikasyen semak agi antara rayat di menua pesisir enggau kandang mengeri di serata dunya.
Dulu suba, versyen komunikasyen nengah sistem jaku pandak (SMS) enggau email diatu udah ditukar enggau aplikasyen alternatif pemadu baru baka WeChat enggau WhatsApp.
“Nengah internet, dunya baka mit endar semina ba ujung tunjuk aja. Penatai channel media rama baru baka Facebook udah nyediaka orang dagang menua pesisir jalai ti lantang agi ngagai sida ngelakuka produk dagang temuai menua nya empu.”
Ku iya, pengawa nyaul produk enggau servis dagang temuai baka nyediaka rumah bemalam, perengka pengangkut, orang gawa nyadi malin temuai, kuli batak mega udah meransang kaul peranak menua pesisir ngagai jalai ekonomi digital.
Kelimpah ari Bukit Buda di Limbang, iya pechaya ekonomi digital mega ulih ngemai empas besai ba dagang temuai ngagai produk dagang temuai ke bukai ti besemak enggau bagi menua tu baka tuchung besapit di tanah tinggi Bario, Batu Lawi.
Dikena nentuka ekonomi digital mujur dijapai, ku iya, beguna endar ngagai perintah nyika peranak menua pesisir enggau kus latih ngambika sida landik ba teknologi pemadah enggau arus penyambung (ICT) nengah komputer enggau telefon pintar.
Berebak enggau nya, iya mega dekaka perintah ngemanahka bungkur sambung renyatan internet di kandang menua pesisir enggau peneras tinggi.
Kebuah pia ku iya, sumber/ pemansut ti ulih dipechaya ari sambung internet endang beguna endar nentuka pedagang menua pesisir nyual produk enggau servis sida ngagai kar dunya dalam industri dagang temuai.
Kaban Kunsil Nengeri (ADUN) Telang Usan Dennis Ngau madah pengawa bekenaka internet dikena ngelakuka dagang temuai udah nyadi kaban kunsi pengawa ngelaku ngagai pedagang dagang temuai menua pesisir.
“Penegap ba dagang temuai kitai iya nya penyelai peranak asal, main asal, rampa menua asal enggau mayuh ke bukai, bala kita enda ulih meda penyelai tu di menua bukai di dunya tu.
Baka pangka jeman digital, ku Dennis, nguing ngagai digital nyadi peluang pemadu manah ngagai semua orang ngaul diri dalam dagang temuai sekalika dagang mit tauka besai.
“Nyema kita mantaika sebarang penerang ba palan dagang temuai besemak kita, kita udah bisi potensi ngemai temuai nemuai kita sereta meri kita awak ngulihka belanja ari dagang temuai. Taja pia, tentu produk ti dikelakuka kita meseti chulin.”
Nyadi seiku kaban politik ti ngembuan mayuh peneleba ba pengawa bekaul pengawa dagang dagang temuai, Dennis udah gawa nyadi tukang nyual enggau menijar operasyen enggau dua bengkah ejensi temuai, Tropical Adventure and Tours Sdn Bhd di Miri enggau Tioman Nature’s Resort of Pulau Tioman di Pahang dientudika gawa ba industri servis nyadi menijar besai Dynasty Hotel Miri sebedau ngaul diri dalam politik.
“Lebuh aku ngepunka pengawa dalam industri servis, kami ngelangkar pakej enggau tailor-made belalauka pemerat bala pelanggan.
“Kami endang bejalaika pengawa besai ngelakuka pakej ba bangsal mandangka dagang di menua tu enggau menua luar.”
“Pemisi internet, tim pengawa ngelaku udah ngena peluang nya ngelaku sereta nerima kangau nengah telefon.
Di sitak Telang Usan, ku iya, peranak menua pesisir udah ngada sereta ngatur pengerami baka lumba ai, festival main asal, pekit Sape, lumba nembika enggau karnival main asal sereta mayuh ke bukai dikena matak penatai bala temuai nemuai ngagai menua nya seraya mansutka penatai pemisi ngagai peranak menua nya.
Taja pia, ku iya madah ngagai The Borneo Post, pengawa ngatur pengerami dikena matak bala temuai ukai pengawa ti muntang dikereja laban begunaka belanja ti besai.
“Ngelakuka sebarang dagang temuai bekaul enggau pengerami di kandang menua pesisir pengawa ti chukup mar dikereja. Ukai baka di kandang mengeri, semua infrastruktur udah bisi magang, bala kita semina beratka perati ba pengawa ngelaku aja.
“Enti sema kita deka ngatur pengerami di menua pesisir baka di Ulu Baram, mayuh pekara patut diperundingka kita baka gaya jalai, perengka pengangkut, pengelikun bala pengusung, perengka guna ke bukai sereta mega pemakai.”
Ku iya nambah, industri dagang temuai nyadi dagang chukup ‘rapuh’ ke alai iya tau dipangka sebarang penanggul baka bala temuai kena serang ba palan digusung sida, ngemai igi penyakit tau berambit sereta pechayaka propaganda enda manah ari bala besemekih dalam industri dagang temuai.
“Bala temuai ari luar enda deka terbai jauh ari menua sida semina deka datai ngagai Sarawak lalu nemuai ngagai Taman Negara Mulu laban sida rindu agi enti bisi mayuh endur ti manah dilawa.
“Pekara tu mar digaga di Sarawak laban rentayan kereja jalai di menua tu enggau sistem perengka pengangkut agi mayuh patut dikemanah. Ba pekara tu, perintah nengeri patut bejalai pengawa ngemanahka infrastruktur nentuka kami ulih besemekih enggau menua bukai dalam industri tu.
Iya ngaku, pengawa nyediaka infrastruktur ngagai kandang menua ulu di Baram, ke alai semua produk dagang temuai – rampa menua asal ti manah enggau main asal peranak asal iya ke bisi, nyadi penekul besai ditapi pedagang dagang temuai laban belanja ba pakej produk dagang temuai tinggi ngujungka peranak menua tu enggau temuai ari menua luar nadai ati.
Ku iya, pejalai nemuai ngagai Taman Negara Mulu ti tebilang di dunya nyangka deka matak mayuh agi nyema bisi sambung jalai menyana agi digaga nyambung genturung pendiau Long Iman di Tutoh.
Nyema bisi sambung jalai manah ku iya, deka ulih matak bala temuai ngasaika palan ti narit ati di Baram.
“Ari Miri, pengusung ulih mansa mayuh bengkah genturung pendiau di sepemanjai jalai ngagai pasar Long Lama, rumah panjai bansa Kayan di sepemanjai Sungai Apoh, genturung pendiau bansa Penan di bagi menua Apoh enggau Tutoh sereta mega ngayam pemanah rampa menua kampung enggau sungai di kandang menua nya.”