Long San model ekonomi digital menua pesisir
Kepala Menteri ngembuan juluk deka meda menua nya diangkat nyadi model pemansang menua pesisir
LONG SAN, Ulu Baram: Kepala Menteri (KM) Datuk Amar Abang Johari Tun Openg bisi juluk deka ngangkatka Long San, Ulu Baram nyadi model menua pesisir ti mansang enggau maju nengah ekonomi digital.
Ku iya nerang, dikena nyapai juluk nya, perintah patut ngena teknologi baru enggau bungkur sambung internet ti besai agi ngemuntangka agi arus penyambung.
“Nguing ngagai juluk nya, tentu kitai begunaka sambung internet manah agi sereta bekal kuasa karan 24 jam.
“Kitai endang nemu peneras sambung internet di kandang menua ulu agi lubah lalu kitai enda ulih nirika tiang pemanchar internet ketegal rampa menua ti bebukit,” ku iya.
Nitih ku Abang Johari, seiti ari chara baru ti deka dipejalai iya nya teknologi ‘Gelembung Internet’ ti deka nyambung arus penyambung serata dunya.
“Tu projek pemungkal ti deka dipejalaika kitai ila dikena mantu ngemesaika arus penyambung komuniti ari sukut ekonomi enggau pelajar antara bala nembiak ditu enggau bekenaka teknologi canggih nya,” ku iya.
Iya mansutka jaku nya lebuh bejadika Program Tuisyen Wang Turu Amanah Pelajar Temenggong Datuk Lawai Jau enggau Program Pemesai Begulai Enggau Rayat di Long San, Ulu Baram, urung lima jam pejalai nengah jalai batang ari mengeri besai Miri, ensanus.
Sama bisi datai Menteri Muda Pelajar enggau Pansik Teknologi ke lalu nyadi Menteri Muda Pengawa Berumah enggau Pengerai Mensia Mayuh Dr. Annuar Rapaee, Sapit Speaker Aum Kunsil Nengeri (DUN) ke mega Kaban Kunsil Nengeri (ADUN) Mulu Datuk Gerawat Gala, Kaban Parlimen ( MP) Baram Anyi Ngau, ADUN Telang Usan Dennis Ngau sereta Residen Bagi Menua Miri Sherrina Hussaini.
Berindik ari nya ku iya, perintah Sarawak mega deka bebendar agi ngiga belanja dikena ngenyampatka pejalai pengawa kuasa Solar Hibrid dikena mansutka bekal kuasa karan di Long San.
“Enti deka nganti belanja ari perintah besai, iya deka ngambi timpuh ti lama. Nya alai, kitai deka bebendar ngiga belanja nentuka kuasa solar hybrid tu dipejalai enggau jampat, enti ulih ujung taun tu,” ku iya nerang.
Ngelansa pasal Program Tuisyen nya, Abang Johari muji pengawa dipejalai dikena mantu ngangkatka pemanah tikas pelajar di Sekula Sekondari (SMK) Temenggong Datuk Lawai Jau.
“Kitai meri terima kasih besai ngagai piak ti melanja program tu, Datuk Tan Thian Hoo enggau saup Lim Chien Ch’eng.
“Jasa seduai ba pemujur pejalai program tuisyen tu kenyau ari bulan March tu tadi meri pangka positif ngagai bala nembiak meretika agi pemesai guna subjek Matematik, Sains enggau Jaku English,” ku iya.
Kenyau ari bulan March tu tadi, Program Tuisyen di SMK Temenggong Datuk Lawai Jau di Long San udah meri pemaik ngagai bala nembiak Pom Satu ti udah dipilih nyereta iya.
Program nya ngemendarka bala nembiak ngena tablet enggau sambung aplikasyen ti disedia belajarka subjek Matematik, Sains enggau Jaku English iya ke udah disedia.
Datuk Amar Abang Johari Tun Openg Kepala Menteri Sarawak