TRS chunto pemadu manah mandangka semangat bansa

MUKAH: Semangat deka ngepunka pengawa ba bala nembiak patut diterenak dikena nempa rebak baru ti mujur sereta nyulut.

Tuai Pemegai Menua (TYT) Tun Pehin Sri Abdul Taib Mahmud madah, Sekula Sekondari Three Rivers (TRS) nyadi chunto pemadu manah mandangkan semangat bansa nya lalu diayan nengah rebak ke dulu suba.

“Udah mayuh bala nembiak ti mujur sereta pegari nama datai ari TRS ba mayuh bengkah bidang enggau pengawa,” ku iya rambau pengawa ngelancharka bup ‘TRS Book The Pioneering Years 1961-1971, bepalan di TRS, kemari.

Pekara baka penusah enggau pemar dalam pengidup ditapi peranak dulu suba mega ku iya nyadi seiti ari pekara ngagai pemujur nya.

Nitih ku iya, pekara ti nempa semangat deka ngepunka pengawa tu patut terus bisi sereta diterenak ngagai rebak baru.

Kebuah pia, ngambika nengeri tu deka terus mansang sereta maju kelimpah dikena napi pemar dudi hari.

Iya agi ingat dulu suba mayuh peranak datai ari kandang menua Mukah mindah ngagai menua bukai kelebih agi adap ke Utura ( Miri) nyerungkai bidang bukai, kelebih agi petroleum.

Sebedau nya, Mukah semina bepanggai ba pengawa betanam betupi enggau berikan lalu pekara nya ngujungka peranak muka runding sida.

Sekeda ari tipan jerita pasal TRS, diberi nama ngangkatka dua batang sungai ti besatup sereta nyadi garis entara menua iya nya Balingian- Mukah- Oya sereta Igan-Paloh-Rajang.

Ngelansa pasal menua di Mukah enggau kandang besemak, iya nyemetak madah, pekara nya nadai belalauka asal penatai tauka bansa, tang semina pekara rampa ngelingi ti nempa penyadi mensia.

Berebak enggau nya, Tun Taib mega bisi ngemendarka geran penyampau RM200,000 dikena mungkal pengawa nulis bup bekaul enggau TRS enggau Mukah diberi ngagai barang sapa ke bisi ati.

Sama bisi mansutka jaku Penaung Serakup Alumni TRS ke mega Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Sarawak Datuk Fatimah Abdullah sereta Presiden Serakup Alumni TRS Ahmad Lato @ Ahmad Castello.