Pemansang sosio-ekonomi nengah dunya digital nyungkak pemisi SME Ekonomi Digital nentuka semua pengawa dagang ulih digaga ba ujung jari
KUCHING: Pemansang dalam dunya Teknologi Pemadah enggau Komunikasyen (ICT) sereta digital dalam kandang dua abad tu ke udah, mayuh ngubah chara komuniti dunya bekereja.
Kediatu, sekali agi komuniti dunya napi ubah pemansang baru dalam evolusi dunya ICT sereta digital, alai nyauka semua sukut pengelantang pendiau komuniti dunya majak bekait enggau dunya siber, sekalika ari sukut pelajar, pengawa rama, ekonomi, tauka ari sukut lepa sereta pemerindang.
Siti ari inisiatif Kepala Menteri Sarawak, Datuk Amar Abang Johari Tun Openg bisi mantaika agenda perintah nengeri ke betatika Ekonomi Digital, bakani pangka Ekonomi Digital ari sukut sosio-ekonomi ke majak bepanggai ba pemansang dunya digital.
Entara pekara ke bekait enggau teknologi ke majak dikena mensia mayuh diatu, iya nya pemansang dalam gajet pintar tauka robot, ‘Virtual Rality’ sereta ke bukai.
Ekonomi Digital mega bisi pangka ba pengawa dagang baka ‘ technopreneurship’ sereta pekara bekait enggau wang – Financial Technology (Fintech).
Dijangka komuniti komersil sereta orang dagang deka bepanggai ba pemadah sereta penemu baru dalam pekara tu, ngambika seriris enggau ekonomi digital.
Kelimpah ari nya mega, taja pan pemansang teknologi digital bansa tu, tang iya mega bisi pangka ba pengelikun siber laban kelimpah ari pengelikun pemadah seiku-seiku kitai, pengelikun siber mega berat dalam pekara dagang tauka e-dagang, wang enggau sistem bank.
Pangka digital mega nyengkaum pelajar, alai kreativiti enggau inovasyen dalam subjek pelajar kemaya hari tu, endang dikemeratka mayuh bengkah pengelandik antarabansa, ke nyadi rega ke berat kena ngemansangka sosioekonomi dalam jeman digital nyengkaum Jack Ma enggau Don Tapscott.
Bedau lama tu tadi, ba siti atur pengawa ti dipunka ulih Abang Johari, Forum enggau Licha Pengelandik dalam Pengawa Dagang ti diatur Malaysian Productivity Corporation kena 23 Ogos, iya madahka ari sukut atur strategi, berat endar ba Sarawak betatika empas ti dibai ari ‘Fourth Industrial Revolution’ (FIR) ke ngasilka inovasyen nengah gempung ari sukut fizikal, digital sereta dunya biologikal.
“Kitai enda tau enda ngambi ulih ba penau pengawa dagang sereta mayuh macham proses, ngambika ulih mai Sarawak ngagai dunya jemah ila ti mansang ke digaga ungkup rayat kitai, enggau chara bekerejasama nengah penemu ke dikunsi sereta penyereta dalam kaul strategik,” ku iya.
Lebuh bejaku pasal orang dagang ke bisi kaul enggau Pengawa Dagang Tengan Pemesai enggau Mit (SME), nitihka rikod Sarawak ngem- buan 60,773 bengkah SME ke nyadi tiang pemun ekonomi nengeri tu, sereta nyendia peluang pengawa ngagai mensia mayuh di Sarawak.
Mayuh ari pengawa SME di Sarawak ti dikerembai di nengeri tu, beratika orang dagang SME bisi tanggung pengawa ke besai dalam strategi pemansang ke silik di menua tu, sereta ngangkatka rama rayat menua tu.
“Beratika pekara tu, orang dagang SME enda tau enda ransing, kreatif sereta inovatif dalam ngerembaika dagang sereta produk sida iya.
“Tang ke pengabis berat, dalam jeman gaya pangka digital ke alai kitai diau kemaya hari tu, sereta peneka enggau pemerat digital di Sarawak, orang dagang SME patut ngena teknologi ti pulaika pemaik ngagai sida empu, ngambika ulih besemekih dalam pangka rampa pengawa dagang kemaya hari tu,” ku iya.
Iya nandu baru madahka, kitai enda tau enda ngelengkas serta nyukung pengawa nanam puku dalam teknologi sereta pekara digital, setipak enggau ekonomi menua sereta ekonomi digital dunya.
“Nya alai, fokus kitai enda tau enda ditegapka enggau teknologi ke betul sereta infrastruktur ke ulih negutka e-dagang, lalu ngubah sereta ngeletakka modal mensia enggau pemain industri nyadi orang ke besedia napi ekonomi digital.
“Nyema orang dagang SME ngambi ulih ngena digital tu, model dagang sereta proses sida iya deka ngaga dagang sida iya besemekih sereta bisi pengulih masuk dagang global,” ku iya.
Ba siti atur pengawa pun taun tu tadi di Bintulu, Abang Johari ti mega nyadi Menteri Pemansang Mengeri enggau Pengeraja Asal enggau Rampa Menua, madahka pemerat iya deka ngangkatka infrastruktur ICT menua tu laban pengawa dagang diatu bepelasarka ‘on-line’.
“Semua pengawa bejual sereta bebelika barang bepelasarka ekonomi digital.
“Pemisi infrastruktur bansa tu meri pengelebih ngagai bala nembiak ngambi ulih ngena pengelandik sida dalam ICT, ngambika sida ulih besemekih dalam dunya pengawa ke bisi baka kediatu tauka jemah ila,” ku iya.
Datuk Amar Abang Johari Tun Openg Kepala Menteri Sarawak