Geran ke udah diagih patut dikena ngatur pemansang
SRI AMAN: Sapit Menteri Dalam Menua, Datuk Masir Kujat ngelalau tetiap Komiti Pemansang enggau Pengelikun Genturung Pendiau (JKKK) di nengeri tu ngambika ngena memanah geran ti diagih pengari rayat sida ungkup pemansang di genturung pendiau sereta rumah panjai enggau nadai ngira penguntung diri empu.
Nitih ku iya, geran diagih pengari rayat patut dikena ngemansang sereta bejalaika mayuh bengkah program di rumah panjai tau genturung pendiau sida lalu ukai nya dikena nguntungka JKKK bekaul.
“Berindik ari nya, kami ke nyadi pengari rayat enggau meda bisi bala JKKK bebagika geran ti diberi ngagai wang turu JKKK ungkup penguntung diri empu, tang geran nya patut dikena pemansang tauka ngatur aktiviti JKKK,” ku iya nyemetak.
Iya ke mega Kaban Parlimen (MP) Sri Aman mansutka jaku nya lebuh bejadika Rumah JKKK Kampung Ijok di Rumah Richard, Ijok Undop, Sri Aman, bedau lama ke udah.
Ba pekara nya, pangku pengawa Chairman JKKK di tetipa rumah panjai tauka genturung pendiau patut berundingka tetiap pekara nya laban sida patut nemu kini kuing belanja ti diagih ngagai JKKK sida.
“Nyema geran tu dibagi ngagai tetiap pintu bilik di rumah panjai tauka genturung pendiau dikena bebelika ramu rumah enggau belanja sekula bala anak, nya nadai ngawa, tang enti dikena ngagai tuju ke bukai, nya penagwa ke salah.
“Wang nya patut dikena meli ramu rumah tauka belanja sekula enggau ke bukai, tang wang dibagi dikena ngereja pengawa nadai tuju sereta nadai pulaika penguntung ruang bilik tauka JKKK bekaul,” ku iya nerang.
Nya alai, chairman JKKK nya empu patut berunding enggau bala kaban JKKK sida, kini kuing belanja, asal geran ari pengari rayat ungkup pemansang JKKK sida.
Sama bisi datai Pemancha Micheal John Sanggop, Tuai Rumah Along Kang ari Entebar Batu Lintang Undop sereta Tuai Rumah Romeo Sherit ari Munggu Demam Undop, Sri Aman.
Berebak enggau nya, Masir mega ngemendarka agih belanja taun 2018 penyampau RM 5,000 enggau RM 3,000 ngagai JKKK enggau Biro Indu, Rumah Richard, Ijok Undop Sri Aman dikena bejalaika aktiviti sepanjai taun sida.