Polis Bintulu deka nentuka pengerami Hari Kebangsaan 2017 diintu likun

BINTULU: Polis di bagi menua tu deka chakah agi bejalaika pengawa nyaga pengelikun enggau pengelantang datai ba maya ngintu Hari Kebangsaan 2017 Renggat Nengeri Sarawak ti deka diatur di Bintulu kena 31 Ogos tu ila, ku Ketuai Polis Pelilih Bintulu, ACP Zailanni Amit.

Ku iya, ba pengerami besai ke tinggal dua hari agi nya, Polis Diraja Malaysia (PDRM) Bintulu mega nerima bantu pemesai ti gawa 537 iku ti deka bejalaika pengawa meresa sereta matau kelebih agi kandang ngelingi pejalai bebala mayuh deka diatur kena pagi 31 Ogos ila.

“Kelimpah ari bejalaika pengawa matau pengelikun, piak kitai ( PDRM) mega deka meresa sebarang orang ngatika diri ti ulih ngasuh penyarut nyadi nyengkaum masang pelekat bisi ngundan jaku petenah enggau ngasut,” ku iya.

Ku iya, piak polis udah nagit raban ‘mat rempit’ ti suah ngemai moto laju nadai ngira pengelikun kelebih agi datai ba hari nyadi.

Berebak enggau nya ku iya, piak sida mega deka meresa pesalah trafik enggau sebarang kes bekaul enggau nyual enggau gian dadah, peragut enggau ke bukai dikena nentuka pengelikun mensia mayuh ti deka meda pengerami nya.

Zailanni mega nangkan sebarang orang enda nunu mercun nyeliahka sida kena tinggang ukum.

“Aku mega ngelalau mensia mayuh ti deka meda pengerami hari kebangsaan tu ngambika pansut tumu, ngambika sida likun mansang sereta enda berumban nengah jalai ti tau ngasuh penusah bebadi nyadi tauka tepekul ba penyekut jalai,” tandu iya.