PBDSB bedau ngaga pemutus nyemilik PH
KUCHING: Ketuai gempung Pakatan Harapan (PH) Sarawak, Chong Chieng Jen begunaka penerang nyengala ari Parti Bansa Dayak Sarawak Baru (PBDSB) ti deka nyemilik PH.
Naka ke diatu, ku Chong, PBDSB ukai sebagi ari Pakatan Nengeri, ukai baka Parti Tindakan Demokratik (DAP) ke alai iya empu nyadi chairman, Parti Keadilan Rakyat (PKR) Sarawak enggau Parti Amanah Negara (Amanah) Sarawak.
“Iya (PBDSB) ukai sebagi ari PH. Nadai penerang nyenggala ari sida deka nyemilik kami dalam PH,” ku iya ba aum pengarang berita PH Sarawak di Indu Opis DAP Sarawak ditu kemari, ti mantaika nama Chong nyadi Chairman PH Sarawak.
Lebuh dipinta nimbal kemari, Presiden PBDSB Cobbold Joh madah, diatu sida benung negi sereta ngempung raban bansa Dayak lalu sida deka ngaga pemutus ba awak ke patut.
Sekretari Besai PH, Dato Saifuddin Abdullah ke mega bisi madahka chairman dua parti penyakal deka terus dipadu nyadi sapit Chong dalam PH, seduai tu iya nya Baru Bian (PKR) enggau Fidzuan Zaidi (Amanah).
Chong nerangka Parti Islam Se- Malaysia ( PAS) Sarawak ukai agi sebagi ari PH Sarawak, pengudah iya nyebut, PAS tinggal kenang aja.
Ku iya, PAS nyemilik Barisan Nasional (BN) lalu nyadi pampang UMNO.
Chong mega madahka komponen ukai- UMNO dalam BN mega nadai ngaga sebarang penetap diri pasal status PAS enggau UMNO.
Saifuddin bisi di mengeri ditu begulai enggau Mandal Presiden Amanah, Hasanudding Mohd Yunus enggau Chairman Unit Polisi enggau Strategi Parti Pribumi Bersatu Malaysia (PPBM), Dato Dr Rais Hussin, betemu enggau bala ketuai penyakal nengeri senentang manifesto gempung PH ti deka dikena maya Pengawa Bepilih Besai (PRU14) tu ila.
Nitih ku Chong, bisi tiga objektif besai pengawa bepilih ungkup Sarawak iya nya numbuhka sekula English, nentuka semua ruang bilik di menua pesisir enggau besemak mengeri disambung bekal ai paip tauka bekal ai beresi sereta ngemesaika agi pegai kuasa ari perintah besai ngagai perintah nengeri nyema PH ulih megai perintah besai pengudah PRU14.
“Dr Rundi madahka 39 peratus tauka 114,000 ruang bilik di menua pesisir eng- gau besemak mengeri bedau nerima bekal ai beresi lalu 100 peratus ruang bilik di mengeri udah disambung,” ku Chong madah ngenang jaku Menteri Bekal Ai enggau Elekterik Menua Pesisir Sarawak, Dato Sri Dr Stephen Rundi Utom.
“Tu jaku dipansutka Dr Rundi empu. Aku nadai kala nempa sengapa,” ku iya nerang.
“Maya PH megai perintah, ruang bilik deka bisi pilih nganjung anak sida ngagai sekula Jaku English, Jaku China tauka Jaku Malaysia,” ku iya nambah.
Ba tikas nasional, manifesto pengawa bepilih PH nyengkaum nginsil chukai barang enggau servis (GST), numbuhka tim mansik isu angat bekaul enggau 1MDB sereta ngurangka belanja idup nyema PH menang maya PRU14 tu, ku iya. KUCHING: Semua piak nyengkaum pemansik renggat antarabansa dilalau besaup ngenataika perambu projek pansik ti engkeman dalam mayuh bengkah bidang ngagai Palan Penyulut Digital Sarawak.
Mandal Canselor, Universiti Malaysia Sarawak (UNIMAS) Prof Dato Dr. Mohamad Kadim Suaidi madah, laban nengah palan nya deka ngasilka produk pansik enggau servis ti betul ke ulih dikena bejalaika ekonomi digital.
Baka ke dipadahka YB Kepala Menteri ku iya, tanggungpengawa palan penyulut nya bejalaika aktiviti Pemansik enggau Pemansang ( R& D) sereta meri penemu ngagai Sarawak Multimedia Authority.
“Kitai deka numbuhka projek ti mungkur mayuh piak dalam projek mansik dalam mayuh bidang tauka projek besai deka diperambu sereta dikenataika ngagai palan penyulut nya.
“Nya alai aku ngelalau sereta meransang sesapa aja bakih kitai ke diluar Malaysia tauka bakih antarabansa, kitai besaup mantai sereta ngenataika perambu pemansik ke patut dipejalaika ngagai palan penyulut tu.
“Nambahka nya, kitai minta entara dalam fakulti kitai enggau fakulti bukai ulih numbuh tauka mantaika projek mansik dalam mayuh bidang sereta deka dikemata Pusat Pengurusan Penyelidikan (RMC),” ku iya seraya madahka UNIMAS dipilih nyadi pengemata perambu pemansik nya.
Kadim mansutka pekara nya ba jaku pengelalu maya Meeting the Challenges of 4th Industrial Revolution ( IR) & Sarawak Digital Transformation, ke diatur UNIMAS ba Arena Gemilang, DeTAR UNIMAS ditu, kemari.
Nitihku iya UNIMAS diatu bisi udah nerima mayuh perambu ari fakulti bebida ke bisi jalai dikenataika ngagai palan penyulut.
Nambahka nya iya madahka UNIMAS enda lama agi deka ngembuan palan inovasyen digital ti dikearapka ulih nyaup Palan Penyulut Digital Sarawak.
“Bisi empat bidang ke dulu dikemeratka perintah nengeri iya nya ‘smart cities’, dagang temuai, betanam betupi enggau ekonomi, lalu nengah chara tu kitai ngarapka penyulut Sarawak ulih nyadika chunto dalam ekonomi digital,” ku iya.
Meeting the Challenges of 4th Industrial Revolution (IR) & Sarawak Digital Transformation diatur nyerumba ngerami 25 taun UNIMAS udah ditumbuhka, ti digulu semua raban akademik enggau pegawai UNIMAS kelimpah ari pegawai ari sekeda ejensi perintah.
Entara pekara ti dipejuraika dalam aum nya baka Educatiion 4.0: The Way Forward ke dibantaika Sapit Mandal Canselor (Akademik enggau Antrabansa) Prof Wan Hashim Wan Ibrahim; The 9 Pillars of Industry Revolution 4.0( Dekan Fakulti Sains Komputer & Teknologi Maklumat, Prof. Madya Dr. Johari Abdullah) enggau The Future of Jobs for Sarawak 4th Industrial Revolution Initiatives: Employment, Skills and Workforce Strategy dibantaika Dekan Fakulti Injiniring , Prof Madya Dr. Al-Khalid Othman.
Sama bisi datai ngagai aum nya kemari, Menteri Muda Industri enggau Pemeranak Puku Malcom Mussen Lamoh, Sekretari Perintah Besai Sarawak Datuk Mansor Man enggau ke bukai.