80 kontijen udah ngulu raptai penuh Hari Kebangsaan Renggat Nengeri S’wak 2017

BINTULU: Bisi 3, 000 pesereta ari 80 kontijen ari mayuh bengkah opis enggau ejensi, gempung korporat sereta pedagang enggau Gerempung Ukai Dikuasa Perintah (NGO) udah ngulu raptai penuh pengawa bejalai bebala mayuh nyerumba ngintu Pengerami Hari Kebangsaan Renggat Nengeri Sarawak 2017 ke deka diatur di Laman Dewan Suarah Bintulu, pagi kemari.

Ba atur program ti berengkah ari pukul 8 pagi nya bela bisi digulu Menteri Bekal Ai enggau Elekterik Menua Pesisir Sarawak, Dato’ Sri Dr Stephen Rundi Utom begulai enggau bala komiti pengatur ke bukai ti nentuka raptai penuh nya bejalai enggau manah.

Ku iya, kelimpah ari atur pengawa nya, kena 30 Ogos bela diatur Pengerami Makai Selamat di masjid Assyakirin urung pukul 6 lemai lalu dipelaba deka disereta Tuai Pemegai Menua (TYT) Sarawak, Tun Pehin Sri Abdul Taib Mahmud enggau bini iya, Toh Puan Datuk Patinggi Ragad Kurdi Taib sereta Kepala Menteri Sarawak, Datuk Amar Abang Johari Tun Openg enggau bini iya, Datin Amar Dato Juma’ani Tuanku Bujang.

“Udah nya, Kepala Menteri Sarawak enggau bini iya dipelaba deka ngulu pengerami ngintu Ambang Hari Kebangsaan di Esplanade Bintulu sebedau pukul 12 tengah malam,” ku iya nerang.

Iya mansutka jaku nya lebuhka dirandau pengarang berita di Balai Suarah Bintulu pengudah tembu raptai penuh diatur, kemari.

Ku iya, atur program malam mantar merdeka ila deka beperindang enggau pengawa belagu sereta tanda ari artis enggau penari menua tu sebedau pengawa mandangka bungai api tepat pukul 12 tengah malam kelai ngintu Hari Kebangsaan.

“Aku endang ngelaluka penatai mensia mayuh, ari dalam enggau luar kandang menua Bintulu, begulai ngerichahka agi pengerami ngintu Hari Kebangsaan ti bepalan di Bintulu taun tu,” ku iya.

Sama bisi datai rambau pengawa raptai nya Menteri Muda Bekal Ai Sarawak, Liwan Lagang enggau Menteri Muda Undang- Undang enggau Adat Bumiputera Sarawak, Datuk John Sikie Tayai.