DBKU ngelanchar kimpin nambaika ‘Jalur Gemilang’
KUCHING: Dewan Bandaraya Kuching Utara (DBKU) nempa sereta ngemeratka penegap runding sayau tauka talukka menua, nengah Kimpin Kibar Jalur Gemilang, kemari.
Kimpin nya diatur ba Dataran Bendera DBKU, Indu Opis DBKU udah digulu Pemangku Direktor DBKU, Morshidi Ahmad enggau Datuk Wee Hong Seng ke nyadi Kaban Dewan DBKU.
Nyerumba atur program nya kemari, pengawa nuatka ‘Jalur Gemilang’ diatur kelai ngerami kimpin nya semanjai ‘Bulan Kebangsaan Negara’.
DBKU bepenemu tetiap iku rayat Malaysia patut bisi penegap runding sayauka menua laban nya ulih nyadika orang seseiku ulih ngasaika nama ke diasaika pemesai dulu suba ke berambun nyawa ngetanka menua.
Nengah chara tu ulih ngayanka rayat tauka orang seseiku bebasa, ngenang sereta ngingatka utai ke udah bantu nyentuk ke sehari tun iya nya pemaik enggau pengelantang sereta politik tegap.
DBKU ngansak sereta meransang mensia mayuh kelebih agi semanjai bulan merdeka tu nuatka Menira Malaysia ti mega dikumbai Jalur Gemilang, kelai bebasaka Hari Kemerdekaan enggau ulah talukka menua.
“DBKU ngarapka mensia mayuh kelebih agi ke diau di mengeri tu nambahka agi penegap runding talukka menua sereta ngemeran enggau ngemeratka ulah sayauka menua dalam pengidup ninting hari.
“DBKU meransang mensia mayuh tauka peranak mengeri nuatka Jalur Gemilang ba rumah, premis enggau perengka pengangkut diri empu sekumbang bulan merdeka menua Ke-60 tu.
“Lalu anang enda ingat, pemaik enggau pengelantang ti diasaika kitai sehari tu enda tau enda ditanka, awakka ulih diasaika rebak dudi ila,” ku DBKU.