Rayat S’wak patut beserakup ngetanka bansa M’sia
Tambai Malaysia patut nyadi kelai ke pengering sukung tetiap raban bansa kelebih agi di nengeri tu
BINTULU: Rebak baru enggau komuniti bukai di nengeri tu patut tegap sereta bediri ba seiti pelasar ngambika terus ngangkatka bansa Malaysia di sebarang alai sida diau lalu enda tepejuh enggau pekara dibai sekeda piak ti ulih ngasuh penyerakup bansa di menua tu pambar.
Direktor Opis Pemadah Nengeri Sarawak Abang Sardon Abang Hashim madah, dalam randau enggau pejurai ba pekara bekaul enggau hak Sarawak belalauka Sempekat Malaysia 1963 (MA63) enggau Gagasan Malaysia, tambai Malaysia patut nyadi seiti pelasar endur kitai patut bediri tegap lalu peranak nengeri tu enda patut lari ari ngangkatka bansa Malaysia nya empu.
“Rebak baru kelebih agi patut ngambi teladan tu laban sida suah dikaul enggau isu ke bansa tu kelebih agi hak Sarawak sereta sekalika
Rebak baru kelebih agi patut ngambi teladan tu laban sida suah dikaul enggau isu ke bansa tu kelebih agi hak Sarawak sereta sekalika nengeri tu bediri sama enggau nengeri ke bukai. Abang Sardon Abang Hashim Direktor Opis Pemadah Nengeri Sarawak
nengeri tu bediri sama enggau nengeri ke bukai,” ku iya.
Ku iya, pekara tu ukai batang pejurai laban kitai patut terus nyadi sebuah menua ti ‘berdaulat’ enggau sentimen ti dibai sekeda piak patut terang agi.
Iya mansutka pekara tu lebuhka bejaku ba Program `Strategic Partnership Engagement and Outreach’ 2017 diatur Opis Pemadah Pelilih Bintulu di Restoran Peace Garden Parkcity Commercial Centre kemari.
Sama bisi datai Pemesai Pemadah Bagi Menua MiriBintulu, Aba Sam enggau Pemesai Pemadah Pelilih Bintulu, Pauline Sating.
Ku iya, penaluk peranak Malaysia enda patut bebagi ba pengawa ngitang Jalur Gemilang sereta ngagai menua tu.
“Kitai ngintu Hari Merdeka enda patut ditanya laban pengawa ti digaga ngambika penyerakup rayat di menua tu enda lemi kelebih agi orang luar mega gaya di menua tu,” ku iya.
Ku iya, isu tambai endang sensitif baka ti nyadi rambau Sukan SEA tu tadi, nya alai, nyadi peranak Malaysia, kitai mega patut sensitif enggau pengawa nyaga tambai menua nentuka basa ngagai menua kelebih agi maya ngintu merdeka.
Berebak enggau nya, iya minta Komuniti 1Malaysia ( K1M) mangku pengawa nabur sereta bekunsika penerang ti betul ngagai peranak menua nya.
Ku iya, 235 buah K1M nengeri tu megai pangku pengawa nya sereta mega gempung ukai dikuasa peintah (NGO) ba pengawa naburka penerang tauka nyadi pengarang berita komuniti ti ulih bekunsika penerang ba media rama sekalika bekaul enggau penusah bah enggau ke bukai.
Ngelansa pasal konvoi Kembara Merdeka Negaraku Renggat Bagi Menua Bintulu ti disereta 23 entukar ari K1M ditu ku iya, program tu nyadi signifikan ukai semina nepan entukar ngelantang ati tang mega reti besai agi kelai peluang ngemai Jalur Gemilang sereta nerenakka semangat patriotik ngagai menua.
Rambau konvoi nya, beberapa bengkah konvoi ngemai Jalur Gemilang lalu udah nya disua ngagai Abang Sardon ari staf Opis Pemadah Pelilih Bintulu, Walter Sideu.
Bela bisi diatur nyerumba program nya, pengawa nyuaka perais ngagai raban pesereta konvoi K1M, ngenang jasa bala staf Opis Pemadah ti udah pinchin, iya nya Sulaiman Sitam (1976-1997), Medan Selawa (1977-2000), Penghulu Morshidi Tali (1988-2000), Ahmad Mohd Sulla ( 1980- 2003), Ketuai Raban Bansa (KK) Suhaili Amran (1969-2000) enggau KK Kederi Junaidi (19751995) sereta program Serumpu Merarau.