Polisi ADUN ngiru sekula enda masuk akal: Chong

KUCHING: Polisi pelajar ke merambu Kaban Kunsil Negeri( ADUN) ngiru sekula dalam kandang sitak diri lalu ngadu program kreatif ngambi ulih ngangkatka komunikasyen Bahasa Inggeris(BI) enda masuk runding.

Chairman Parti Tindakan Demokratik ( DAP) Sarawak Chong Chieng Jen madah naka bulan September 2016, bisi 1,264 sekula primari enggau 190 sekula sekondari di nengeri tu ke alai penyampau ADUN di Sarawak semina 82 iku aja.

Ku iya, enda ngira baka ni chara ngemujur program nya, meseti bisi lebih 90 peratus sekula deka enda disengkaum program.

“Ba kami, seiti chara ke ulih ngangkatka BI ungkup nembiak rebak baru iya nya nengah atur ngangkatka sekula BI lalu nguna BI nyadi bahasa ‘pengantar’.

“Kitai ngasai tu mih chara ke pemadu engkeman lalu tu udah diperambu dalam polisi Gempung Penyakal enti diberi kuasa pengudah PRU-14,’ku iya.

Iya mansutka jaku nya ba aum pengarang berita ke bela digulu pemantu ‘khas’ Abdul Aziz Isa di Indu Opis DAP ditu, kemari.

Chong ke mega mandal Presiden Pakatan Harapan pechaya enti perambu nguna BI ba luar kelas lalu semua subjek diajar nguna Bahasa Melayu(BM), perambu nya enda ulih dikemujur.

“Sigi udah nyadi ulah mensia ti suah agi deka nguna jaku ke mudah.

“Nambahka nya, Perintah Besai udah ngagihka mayuh belanja ungkup pekara pelajar nengah Opis Menteri Pelajar lalu insentif nya patut dikena enggau manah,”ku iya.

Kaban Parlimen(MP) Bandar Kuching nya madah, aum Dewan Rakyat ke udah, Menteri Pelajar madah dalam Bajet 2016 penyampau RM135 juta diagih ungkup pengawa ngangkatka BI enggau BM(MBMMBI).

Kelimpah ari nya ku Chong, dua insentif iya nya High Immersive Program (HIP) deka diadu di sekula sereta Dual Language Programme deka diadu nengah chara optional ungkup sekula ke dipilih nengah belanja RM38.5 juta.