Bangkai niang Lans Koperal Valentino dibai pulai
Niang suah berandau enggau aku nengah telefon tang nadaika nusui sebarang penanggul, ku apai iya
SIBU: Apai niang Lans Koperal Valentino Mesa, 29, madah ke penudi endar iya betemu enggau Valentino iya maya pengerami Gawai Dayak dalam bulan Jun taun tu tadi.
Apai niang, Mesa, 53, madahka anak iya bisi berandau enggau iya nengah telefon.
“Iya nadai kala nusui sebarang penanggul,” ku iya madah lebuh dikerandau pengarang berita ba palan penyangkai bilun kena malam Hari Empat tu tadi.
Valentino di temu parai, ketegal ditimbak ari semak sereta dipantap ngena objek tajam ba Balai Polis Pinggiran Subang Jaya di Kuala Lumpur pukul 3.25 dinihari Hari empat.
Ku Mesa,Valentino anak ketiga ari enam iku diri menyadi, empat lelaki lalu dua iku indu.
Iya madahka diri tekenyit ninga berita ari anak lelaki iya ti dipadah bini Valentino, ke alai Valentino udah nadai.
Ku iya, sida sebilik merambu deka ke Kuala Lumpur ngambika ulih nemu silik agi pasal pekara nya, tang udah enda ngemanjaika juluk nya pengudah dipadah bangkai niang Valentino deka dianjung pulai ke Sarawak kena Hari Empat.
Bangkai niang sangkai ba padang bilun Sibu pukul 9.35 malam Hari Empat.Urung 200 iku nyengkaum sapit komisionyer polis nengeri Datuk Pahlawan Mohd Dzuraidi Ibrahim, pemesai polis ari serata nengeri enggau sida sebilik sama bisi engagu nerima penatai lungun nya, ke alai iya udah diberi basa.
Polis udah nya lalu mai bangkai niang pulai ke Pakan. Bangkai niang deka dikubur kena 3 September.
Berebak enggau nya, siku ari aka iya ti benung nampung pelajar di Pulau Pinang, madahka iya lalu pulai pengudah nerima ti madahka bangkai niang dibai pulai ke Sarikei, udah nya lalu ke Pakan.
Ku iya, ke penudi endar iya berandau enggau Valentino iya nya kena malam Hari Tiga, pukul 9.00 malam.
“Iya empu bisi madah deka datai ngabas aku lebuh maya kemisi.Maya nya kami bejaku baka selama,” ku iya.
Iya nadai kala nusui sebarang penanggul. Mesa Apai Niang Koperal Valentino