Polis deka meresi Miri ari judi siber
Aktiviti judi siber ba Miri majak nyadi taja mayuh pengawa ngabas ngenyit dipejalaika
MIRI: Polis Sarawak ngembuan juluk deka meresi nama Mengeri Besai Miri ari aktiviti judi siber, ke majak nyadi, taja mayuh pengawa datai ngenyit udah dipejalaika ba serata nengeri tu.
Ketuai Opis Pemansik Penyalah (CID) Sarawak Datuk Dev Kumar madah DSP Lee Swee Sake ke baru mangku pengawa nyadi ketuai CID Miri bulan tu tadi diberi tanggungpengawa nguluka raban ba pengawa nya.
“Diatu bisi tauke ke enggai ninga penemu majak bejalaika aktiviti belalai, kelebih agi ba Mengeri Besai Miri,” ku iya nengah sebengkah penerang ditu kemari.
Lee, 38, ex-pemesai sekretariat CID Bukit Aman, dipadu nyadi Ketuai CID Miri nukar ASP Soliment Nyian kena 25 Ogos.
Ngembuan master degree Sains Penyalah ari University College of London, Lee nyereta pengawa polis kenyau 12 taun ke udah lalu kala gawa ba sekeda sitak nyengkaum ba
Diatu bisi tauke ke enggai ninga penemu majak bejalaika aktiviti belalai, kelebih agi ba Mengeri Besai Miri. Datuk Dev Kumar Ketuai CID Sarawak
Johor enggau Kedah.
Ngenang pasal judi nadai permit di Sarawak, Dev madah polis mujur nangkap 215 iku, ngelawa 74 palan judi siber, empat sarang judi mit enggau kelang sabung bepun 1 ngagai 31 Ogos taun tu.
“Ari 215 suspek ke ditan, nyengkaum 12 peranak menua luar beumur 15 ngagai 65 taun, 158 nya lelaki,” ku iya.
Kenu ku iya, polis mujur ngerampas RM22,444 rambau 74 pengawa datai ngenyit ke dipejalai ba palan judi empat palan nyual lumur nadai lisin sereta 108 komputer enggau RM3,672 ari palan judi siber.
Berebak enggau nya, iya madah semua palan pemerindang diri sebilik ke bejalaika mesin judi slot enggau ikan di Sarawak, udah ditutup.
“Pengawa munaska judi nadai lisin ba Sarawak sigi dipajak,” ku iya. — Bernama