Rayat Batu Danau sebana bungkur arus internet rapas
LIMBANG: Penanggul bungkur arus Internet ti agi rapas ditapi rayat di menua pesisir lebih agi ba Danau taja pan perengka tiang telekomunikasyen bisi digaga ba sitak nya.
Kaban Kunsil Nengeri (ADUN) Batu Danau, Paulus Palu Gumbang madah bisi sekeda tiang telekomunikasyen digaga ba Kuala Mendalam, Hulu Pandaruan enggau Batu Danau tang arus internet ditu mengkang enda ngemuas ati.
Ku iya, serikat telekomunikasyen ngembuan tanggungpengawa nyedia servis ke menyana ungkup rayat ba sitak nya.
“Bungkur arus internet na sekeda sitak ba Batu Danau agi rapas.
“Tu nyadika penanggul ngagai rayat di menua pesisir ke deka bejalaika pengawa dagang bepelasarka Digital Ekonomi,” ku iya rambau dirandau media beserimbai enggau Pengerami Hari Raya Korban ba Kampung Palas ditu, kemari.
Bela datai Pemesai Khas Paulus, Jimmy Ngindang, Pemancha Nicholas Buyok Pura enggau Ketuai Kampung Palas, Kipli Muda.
Ku iya, taja perengka tiang komunikasyen udah digaga ba sekeda endur tang bungkur internet agi enda ngemantup ati.
“Serikat telekomunikasyen patut mutarka penanggul tu ngambika japai internet di Batu Danau ulih laju.
“Penanggul enda ulih ngemasukka penerang enggau gambar ngujungka mensia mayuh ti deka ngelaluka sebarang produk ba internet nyau tejanggal,” ku iya.
Berebak enggau nya, Paulus bisi meri seiku kitu.
Lebih 300 peranak Kampung Palas ke diau bepalan ba 23 kilometer penyauh ari pasar Limbang lalu bisi 54 buah rumah.
Kelimpah Kampung Palas, empat iku kerbau mega bisi diberi ngagai Kampung Medait, Belading, Anak Bukit enggau Kuala Awang taun tu.