Apai indai patut mandang ulah ti manah ngagai anak

SIBU: Apai indai dilalau ngambika enda nempayaka pekara pelajar anak sereta tentuka anak sida enda tinggal ari nembiak bukai.

Lebuh bejaku ba pengerami bejadika Panggau Rayat nyerumba Pesta Sibu Jaya apin lama ke udah, Kaunselor (Kr) Kaunsil Pelilih Menua Pesisir Sibu (MDLBS) Teo Boon Siew madah, taja mayuh penanggul, tang apai indai patut naka ulih meri pelajar ke menyana ungkup anak sida.

Berebak enggau nya, iya temegah meda bala apai indai ke udah nganjung bala anak sida bejalar ba sekula China.

“Aku bejaku baka ke malam tu ukai deka ngelakuka sesebengkah jaku. Tang, nyema kita landik bejaku ba mayuh jaku, nya deka meri pengelebih ngagai kita empu.

“Tang pekara ke beguna iya nya kita meseti nentuka bala anak kitai belajar enggau menyana,” ku iya bejaku ba mua lebih 3,000 temuai.

Kelimpah nya, ku iya ngenang pasal baka ni chara apai indai ulih nyadi chunto ke manah ngagai anak ba pengidup ninting hari.

“Enti kitai mandangka ulah ke enda manah ngagai bala anak, baka ni kitai deka nyalahka sida nyema nunda chara kitai.

“Ari terus nyalahka anak, manah agi kitai mandangka chunto ke manah awak dititih sida,” ku iya.

Kelimpah nya, Teo mega ngenang pasal pemansang ba menua Sibu Jaya ke majak berubah baka begunan enggau rumah baru ke mayuh digaga.

Tambah mega ku iya, mayuh aktiviti bisi diatur ba di Sibu Jaya, kelimpah lampu ti mayuh chura dipasang chukup manah dikena matak bala temuai.

“Laban ke nyadi kaban kaunsil MDLBS, aku berasai temegah laban Sibu Jaya bepalab ba baruh jaga kami (MDLBS). Sibu Jaya sempama pesaka kitai,”ku iya.

Teo andal, Sibu Jaya deka terus mansang dibaruh jaga perintah ke diatu nengah MDLBS.