Ketam ‘Neocrab’ bisi kualiti tinggi
LUNDU: Sapit Kepala Menteri Datuk Amar Douglas Uggah Embas kemari bejadi pegung endur nupi ketam ‘Neocrab’ di Loba Stoh Rambungan, Lundu.
Ba pengawa nya, iya ke mega Menteri Betanam Betupi Moden, Tanah Adat enggau Pemansang Kandang Menua bisi mendingka penerang sentang tusun pengawa ba pegung Neocrab sereta ngemata pegung ke udah dibuka.
Direktor Ginger and Coconut Development Sdn Bhd (kompeni ngempu Neocrab), Umang Nangku Jabu ba jaku penerang madah Neocrab beratka kualiti ba ketam ke dipansut.
“Ketegal ti netapka juluk deka ngemansut ketam ke ngembuan kualiti, kitai nguna teknologi nupi ketam ke pemadu engkaman ngambi ulih nentu pemeli nerima ke pemadu manah.
“Asil kitai nya deka bisi setipikit HACCP, ti deka meri jamin ngagai pemeli ari sukut pengelikun pemakai,” ku iya.
Iya nambah, penau saintifik, teknologi baru enggau atur nupi chara moden ke diguna ba Neocrab sigi deka nentuka ketam ke dipansut bekualiti tinggi.
Nitihka penerang Umang, Neocrab diatu bisi 18 iti pegung lalu udah diisi enggau anak ketam ba bulan Mac tu tadi.
Kelimpah nyadang ungkup makit Sarawak, ketam ari Neocrab mega deka dikelaku ba Singapura, Semenanjung Malaysia, Hong Kong enggau China.
Bela datai bini Uggah, Datin Amar Doreen Mayang, Penyanding Penemu Sains Sarawak Datuk Patinggi Tan Sri Dr Alfred Jabu, CEO Neocrab Dr Colin Shelley enggau orang bukai.