Abang Johari: Penerang baru MA63 ditemu
Nyadi chara engkeman dikena ngambi pulai baru hak nengeri tu baka ti udah disain dalam MA63
KUCHING: Raban ti diketuaika Menteri Muda ba Opis Kepala Menteri(Undangundang,Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali ke London, ngiga penerang bekaul enggau Sempekat Malaysia ke disain 54 taun ke udah, bisi tetemuka penerang baru.
Kepala Menteri Datuk Amar Abang Johari Tun Openg madahka diri bisi chara engkeman dikena ngambi pulai baru hak nengeri tu, baka ti udah disain dalam Sempekat Malaysia 1963 (MA63).
“Aku udah nganjung Hasidah ke London, ngiga hak kitai di London ti disain kitai dalam MA63.
“Lebuh kitai nganjung Hasidah enggau raban iya, sida bulih penerang baru.
Lebuh kitai nganjung Hasidah enggau raban iya, sida bulih penerang baru. Tang aku bedau deka nyerita, laban bisi chara aku ngambi pulai baru hak kitai. Datuk Amar Abang Johari Tun Openg Kepala Menteri Sarawak
Tang aku bedau deka nyerita, laban bisi chara aku ngambi pulai baru hak kitai.
“Ngelama tu kitai enda nemu laban mayuh dokumen. Ba kabinet orang putih nya resia. Nya baru dibuka kitai,” ku iya ti ngenang pekara nya enggau pandak.
Dulu ari nya Abang Johari nyuaka dagin ke diagih ngagai 250 iku penerima ti tusah ari 14 genturung pendiau ke ngelingi, ba Majlis Korban Perdana ti diatur ba Masjid Darul Hana ditu, kemari.
Apin lama, lebuh ke bejaku ba pengerami Hari Kebangsaan di Bintulu, Abang Johari madahka Sarawak ulih ngambi hak baka ke dipesetuju lebuh semaya nya disain 54 taun ke udah.
Berindik ari nya, iya madahka pengawa berunding enggau perintah besai bekaul enggau hak Sarawak ke udah lenyau deka dipajakka.
Lalu ku iya, pengawa kitai ke minta hak Sarawak nya ukai reti sukung ngagai penumbuh Malaysia udah bebagi.