Kelab Raban Iban Sebelak mujur dipenyadi
KUCHING: Kelab Raban Iban Sebelak (KRIS) mujur dipenyadi Sapit Kepala Menteri Datuk Amar Douglas Uggah Embas di sebuah hotel ditu, malam ensanus.
KRIS ditumbuh enggau tuju ngempun sereta ngempung bala nembiak redak ke datai ari menua Sebelak, Roban dalam Pelilih Kabong.
Chairman KRIS Sylvester Rangga ba jaku pengelalu madah kelab deka mantu ngangkatka pengidup raban Iban ke mindah ari menua asal, ti udah ngentapka pendiau diri di Mengeri Kuching.
“KRIS endang menatika pemujur, pengelantang pendiau, pengelikun enggau pemaik bala diri sekaban belayan.
“Semua tu mungkur sukut pelajar sekula, rekreasyen enggau pengawa rama, main asal, daya idup enggau mayuh mega utai bukai,” ku Sylvester.
Ba pengerami nya, Uggah ba jaku bejadi pengawa ngarap KRIS ulih nempa kerejasama enggau Kelab Saribas ke udah ditumbuh ba taun 1993.
Ku Uggah ke mega Menteri Betanam Betupi Moden, Tanah Adat enggau Pemansang Kandang Menua, kerejasama nya ulih dipungkal nengah pengawa dagang.
“Engka kitai ulih mungkal kerejasama tu ba pengawa dagang. Aku ngasai kitai ulih mungkal nengah atur numbuhka koperasi.
“Kitai bela ngadu pengawa sereta nyukung pangan diri,” ku Uggah.
Uggah pechaya kededua Kelab (KRIS enggau Saribas) ulih mai pemaik ngagai semua ba atur nitihka singkang bansa bukai nuju ekonomi digital.
Ba pengerami kemari, raban nembiak ke nyulut ba peresa renggat sekula enggau pelajar tinggi bisi nerima insentif pemansang pelajar ari KRIS.