Anang malut isu jalai pengarap enggau pekara nyiri kaban Kaunsil Petros

KUCHING: Mensia mayuh dilalau ngambika enda malut isu pengawa nentuka Kaban Kaunsil Direktor Petroleum Sarawak Berhad ( Petros) enggau isu jalai pengarap.

Kepala Menteri Datuk Amar Abang Johari Tun Openg ngarapka orang mayuh di Sarawak ngambika enda terunda enggau chara sekeda orang di luar nengeri tu.

Nitihku iya, seiti agi penuduk puang dalam kaunsil direktor Petros deka diisi orang ti chukup bepeneleba.

“(Nama) Nganti dulu. Kitai ngiga sereta begunaka orang ke chukup bepeneleba.

“Datuk Mohammad Medan Abdullah iya nya bansa Kelabit. Orang bemain enggau jalai pengarap, anang nitih tauka anang tererunda enggau pekara ke nyadi di Semenanjung Malaysia,” ku iya.

Iya ditanya bekaul enggau isu ke benung chapuh dikerandauka orang mayuh ba media rama, berindik ari lis nama ahli lembaga pengarah Petros ke nadai Bumiputera ukai bepengarap Islam.

Apin lama, Opis Kepala Menteri nengah penerang berita madahka Tan Sri Datuk Amar Dr. Hamid Bugo dipilih nyadi chairman Petros.

Petros deka bisi lima ahli Lembaga Pengarah, ke alai empat udah dipilih iya nya Datuk Mohammad Medan Abdullah, Sharbini Suhaili, Zuraimi Sabki enggau Heng Hock Cheng.

Nitihku Sapit Kepala Menteri Datuk Amar Douglas Uggah Embas ba sebengkah pengerami serumpu makai malam apin lama madahka, Bumiputera ukai bepengarap Islam entara ahli Lembaga Pengarah Petros deka dipilih enda lama agi.

Uggah madahka iya udah dipinta kepala menteri ngiga chalun ti pemadu engkeman mangku penuduk nya.

Iya madahka beberapa pekara dikemerat sereta kriteria enda tau enda dititihka, dikena ngisi penuduk nya.

Beberapa nama udah diperambu tang kitai meseti, keterubah, nentuka orang ke dipilih nya amat bekualiti. Tang kitai ngarapka ngiga orang ke pemadu senipak, ku Uggah lebuh dikerandau raban pengarang berita ba pengerami serumpu makai malam nya, apin lama.