DTTG ngandalka polis ulih lengkas mutarka kes munuh Valentino Mesa
SIBU: Dayak Think-Tank Group (DTTG) andal amat piak polis lengkas mutarka kes munuh niang Lans Koperal Valentino Mesa.
Seiku ari raban gerempung tu ti mega Ketuai Publisiti DTTG pampang Miri Peter Saba madah, penusah ke nuntung niang nya balat ngenyinu ke ati nambahka niang ditemu dibunuh ba opis polis alai iya gawa.
“Kitai baka bala bukai arap amat piak polis mujur mansik kes tu enggau silik lalu mai orang ke munuh niang dipechara ba kort,” pia ku iya madah ngagai pengarang berita, kemari.
Nambahka jaku iya, Peter madah, DTTG enda lantang ati amat meda chara niang ke dibunuh nya.
Iya madah, enti nyema orang ke ngereja penyalah nya enda mujur digiga enggau lengkas tu deka nejuka rayat berasai nangi sereta ngasaika diri enda likun ba menua ke dipegai sistem pengelikun menua baka ke diatu. “Kitai meri penyinu ati nga- gai bala niang sebilik lalu ngarapka sida enggau ati ti sabar napi penusah ti berat baka tu,” ku iya madah baru.
Seiku agi raban DTTG iya nya Sekretari DTTG Betong Sylenthia Musa madah, niang patut bendar diintu enggau chukup basa laban niang ditemu dibunuh maya niang gawa, bebadi maya ngetanka pengelikun menua.
“Niang seiku Bujang Berani menua tu.
“DTTG minta piak Polis enggau Perintah Nengeri meri basa ke chukup ngagai niang,” pia ku iya madah.
Niang, 29 taun, disengai ba rumah panjai sida di Rumah Maing, Lubuk Besai Entaih Entabai, Julau.
Iya dipadahka deka dianjung ke pendam sehari tu (3 September).