25 pedaja ba Jalai Batu Kitang minta MPP nginsil notis pindah
KUCHING: Bisi 25 iku pedaja Bidayuh ke bedaja ba tisi jalai di Kpg Bumbok, Jalai Batu Kitang ditu minta Kaunsil Mengeri Padawan (MPP) nginsil notis ngasuh sida pindah.
Nitih ku Pemantu Khas Kaban Parlimen (MP) Bandar Kuching, Chong Chieng Jen, iya nya Abdul Aziz Isa, MPP udah ngerah bala pedaja ngererak bansal sida.
“Raban pedaja Bidayuh ditu udah bejalaika pengawa bedaja sayur nyadika pemansut penatai pemisi sida kenyau ari 20 taun ke udah. Bisi sekeda ari sida nya apai tauka indai tunggal lalu nyadi orang ti ngiga belanja ke diri sebilik, balat bepanggai ngagai pengawa bejual ba bansal kayu dikena ngulihka anak belanja.
“Bala sida irauka nasit diri sebaka enggau bala pedaja di Pasar Minggu Satok enggau Benteng Satok, ke alai lenyau 80 peratus ari penatai pemisi sida pengudah bansal sida direrak pengudah misag ngagai Medan Niaga Satok di Kubah Ria,” ku Aziz dalam penerang berita, kemari.
Iya madahka diri udah bejalai ngabas endur nya seraya deka nemu silik agi pekara ti ditapi bala pedaja pengudah nerima kangau ari sida.
“Aku dipadahka bala pedaja ke alai MPP enggau Chairman Lo Khere Chiang udah baum enggau sida kena 17 Julai bekaul enggau jaku gerah nya.
“Pengudah nerima jaku bantah ari bala pedaja, Lo Khere Chiang setuju sereta besemaya ngena mulut ngagai sida ke alai MPP enda nyadi ngererak bansal sida sereta nyamin bala pedaja deka terus ulih bedaja dia,” ku Aziz nambah.
Nya alai ku iya, bala pedaja tekenyit lebuh nerima notis kena 18 Ogos 2017 ari MPP ti ngerah sida pindah ngagai Palan Komuniti Kpg Bumbok.
Nitih ku iya, notis madahka MPP rambau aum kuansil khas ke diatur dalam bulan Ogos udah ngaga pemutus senentang pekara nya.
Notis tu mega minta bala pedaja meseti ngererak bansal sida dalam kandang 30 hari berengkah ari hari bulan sida nerima surat nya.
Bala sida mega dipadah ke alai MPP udah maduka kunteriktor ti deka datai kena 19 September bejalaika pengawa ngererak.
“Baka ni Lo Khere Chiang kempang bulaka semaya ti digaga iya ngagai bala pedaja?” ku tanya Aziz.
Ku iya, bala pedaja mantah pengawa ngasuh sida mindah laban endur bedagang ke baru ‘enda strategik’.
“Sida ti deka meli mega mar ngengkahka kerita laban deka ngasuh jalai sekut. Jalai tama ngagai Balai Komuniti Kpg Bumbok kelalu semak enggau lampu trafik ti tau ngeruga pengelikun pengguna jalai alun,” ku iya nambah.
Ku Aziz, bala pedaja enggau mindah laban palan komuniti nya nadai ngembuan endur ti nyengala ungkup bangsal halal enggau enda halal.
“Ngagai bala pedaja baru ti mindah ngagai Palan Komuniti Kpg Bumbok bejualka ai bisi enggau pemakai enda halal lalu tu nyangka mangka dagang pedaja nyema sida mindah kia.
“Ngarika bala pedaja, aku ngansak MPP enggau Lo Khere Chiang narit pulai baru notis tu enggau jampat sereta ngamatka semina iya nentuka pengelantang bala pedaja,” tandu iya.