Penuduk Dayak ba IPB patut diterang nyemetak

Penuduk Dayak ba IPB, Unimas ditumbuh 1 March 1997 bejalaika pansik khas pasal Dayak S’wak, Borneo

KUCHING: Parti Bansa Dayak Sarawak Baru (PBDSB) deka nemu penerang nyemetak pasal Penuduk Dayak ti ditumbuh di baruh Institut Pelajar Borneo ( IPB), Universiti Malaysia Sarawak (Unimas) kena 1 March 1997.

“Nama penyadi ngagai Penuduk Dayak ba Unimas?” ku tanya parti nya nengah penerang berita dipansutka kemari.

Nitih ku penerang PBDSB, Penuduk Dayak sebengkah skop pansik nyengkaum perati ba pekara bekaul enggau pemansang bansa Dayak ari Sarawak enggau Borneo.

“Taja mayuh bengkah pekara adat Dayak udah dipansik enggau asil ti mayuh, agi bisi sekeda pekara majoriti ditapi komuniti Dayak kelebih agi ba main asal enggau daya idup ti begunaka pansik ke lebih silik,” ku parti nya.

Iya madahka Penuduk Dayak dipelaba ngaul mayuh bengkah pansik ngambika dipereti, ke bukai, isu ngadaka peluang gawa enggau pemansut penatai pemisi ngagai komuniti Dayak.

Isu ngelala pangku pengawa enggau kelala bansa Dayak lebuh sida tama ngagai abad ke-21 sereta mega kaul antara pupu bansa Dayak enggau raban tebing tasik sereta di mengeri, orang baru mindah ari bagi menua ke bukai dipelaba deka dipansik, ku PBDSB nambah.

Iya madahka perintah nengeri, Yayasan Tun Jugah enggau Yayasan Main Asal Dayak udah ngagihka belanja ngagai Penuduk Dayak kenyau ari taun 1997.

“Nya gerempung besai ti udah ngagihka belanja, Yayasan Tun Jugah udah merambu ngasuh ex-kurator Muzium Sarawak, Dr Peter Kedit dipadu nyadi ketuai ngiring pansik Dayak nya.

“Sebedau tu, bisi diterangka seiku ex-menteri Sarawak udah nulak perambu nyiri Peter.

“Nya cherita 10 taun ke udah, tang nyentuk sehari tu, Penuduk Dayak nya ukai semina enda chakah gawa, tang mega sengaja enda dikeingat enggau nadai dikeibuh agi,” ku PBDSB nyemetak.

Nya alai, ngaul pekara ke sebaka deka nanyaka nama penyadi ngagai belanja ungkup pansik nya.

“PBDSB sereta komuniti Dayak endang patut nemu saut ari piak bekuasa bekaul nyengkaum Unimas senentang pekara tu.

“Nyema lalu nadai penerang, anang nyalahka komuniti Dayak ari terus ngaga simpul penemu tauka peragam kediri empu,” ku parti nya nandu.

PBDSB sereta komuniti Dayak endang patut nemu saut ari piak bekuasa bekaul nyengkaum Unimas senentang pekara tu. Penerang PBDSB