Bisi 236 iku nembiak tadika di Kapit nyereta pekit ngelinsu Hari Merdeka
KAPIT: Opis Pemadah Pelilih Kapit ransing nerenak ulah angkun ke menua ba bala nembiak sekula berengkah ari umur ke agi biak.
Ketegal nya, empai lama tu tadi, piak sida bisi ngatur Pekit Ngelinsu Beserimbai Enggau Bulan Merdeka ba Tadika Private Methodist Kapit.
Pekit nya mujur matak pengerindu 236 iku nembiak tadika nya.
Pemesai Opis Pemadah Kapit Garai Entili madah, chara baka nya tau bendar ngembing nembiak mit be- labuh nemu reti ulah angkun ke menua diri.
“Kitai deka mai nembiak berengkah ari umur ke agi biak bela ngembuan ulah baka tu lalu pulai ke pemanah ngagai sida enggau menua tu jemah ila.
“Nambahka nya, ari pengawa baka tu, kitai ngembing sida ngambika nemu sejarah ke betul menua tu,” pia ku iya madah maya pekit nya diatur.
Kelimpah ulah angkun ke menua, ku Garai, penemu enggau peneleba ke diulih nembiak maya bepekit baka tu mega tau bendar ngerandang jalai ngagai sida mekuhka ulah bebasaka pangan diri bepun ari begulai belajar ba menua ke diuan pupu raban bansa ti enda sama jalai pengarap enggau bansa.
“Taja kitai meda pekit tu baka ke mit tang reti iya besai ba pekara nempa ulah nembiak mit,” ku iya madah baru.
Sama datai mandangka sukung ngagai program tu iya nya Prinsipal Tadika Private Methodist Kapit Petrohella Biya, Ketuai Komuniti 1Malaysia (K1M) Taman Indah, Tang Bukok sereta bala bukai.