Pengajar di menua pesisir patut meretika ubah pelajar menua

SRI AMAN: Pengajar di menua pesisir patut meretika ubah pelajar menua ngambika mansang agi sereta ulih besemekih seriris enggau pemansang menua, pia ku Menteri Muda Pengelantang Komuniti Sarawak, Datuk Francis Harden Hollis.

Berebak enggau nya ku iya, tetiap iku pengajar patut bekerejasama enggau Gerempung Apai Indai enggau Pengajar (PIBG) ngambika sekula nya ulih mansang agi sereta ulih besemekih seriris enggau pemansang menua kemaya hari.

“Bala apai indai mega patut ngemeratka pelajar bala anak sereta anang kelalu nejuka tanggungpengawa sida ngagai bala pengajar aja.

“Kebuah pia, bala anak kitai nyadi bala ketuai menua dudi hari,” ku iya.

Iya ke mega Kaban Kunsil Nengeri (ADUN) Simanggang mansutka jaku nya lebuh bejadika Pengawa Nyuaka Program Bantu Pelajar Yayasan Sarawak di Balai Hollis Tini, Sekula Sekondari (SMK) Sri Aman ditu, ensanus.

Nyerumba pengawa nya mega, Harden minta semua piak bekerejasama mantu perintah ba pekara pelajar lalu anang enda kiruh sereta semina bepanggai ba subsidi enggau bantu perintah aja.

Ku iya, perintah udah mayuh mantu nyediaka bemacham perengka guna dikena sekula sereta ngemuntangka pengawa bala pengajar ngambika sida ngangkatka penyulut sekula.

Nya alai ku iya, bala pengajar patut ngena awak nya ngangkatka penyapai sekula enggau pengawa nyeridi sereta nempa modal mensia ti nyulut sereta pegari nama.

Pengawa tu mega udah digulu pengari Direktor Yayasan Sarawak, Abdullah Abdul Gafor, Pemesai Pelajar Pelilih Sri Aman, Vevien Mujah, Prinsipal SMK Sri Aman, Mohd Nor Narudin sereta bala bukai.

Nangkan nya, bisi 187 iku nembiak ari sekula primari enggau sekondari di Sri Aman ti udah dipilih bisi nerima bantu pelajar ari Yayasan nya.