HDA dikeandal ngemansang menua kandang tanah tinggi
MIRI: Ejensi Pemansang Tanah Tinggi (HDA) nyadi ejensi pemadu engkeman bejalaika pemansang di kandang tanah tinggi di nengeri tu ti ngembuan potensial besai dikemansang ari sukut infrastruktur sereta mega ekonomi.
HDA ti ditumbuh Kepala Menteri Datuk Amar Abang Johari Tun Openg ti gawa ngemeratka batang perambunengah pengawa bejalaika pemansang ungkup Ulu Baram enggau pragmatik, baru enggau ngena strategi dikena nentuka penyampat pemansang fizikal enggau ekonomi di Ulu Baram.
Lebuh Kepala Menteri nemuai seraya betemu enggau rayat ngagai Long San, Ulu Baram bedau lama ke udah, Kaban Kunsil Nengeri (ADUN) Telang Usan bisi mantaika lapan bengkah penyikap perengka guna ungkup peranak ari baruh sitak nya ba jaku pengelalu iya.
Sekeda ari peminta ari kandang menua San di Ulu Baram ti mungkur lebih ari 20 buah rumah panjai enggau genturung pendiau bansa Kenyah sereta Kayan ngambika diangkat nyadi Pelilih Mit ari baruh Pelilih Telang Usan, minta perintah ngemanahka semua sistem jalai kayu batang di Telang Usan ngambika ulih ditengah kerita lalu enti ulih dibelakin, enggau nyediaka sistem arus penyambung ngagai semua genturung pendiau ti mega udah nyadi isu ngelama tu.
Dennis mega minta penyikap perengka guna manah agi ungkup klinik di Long San, lima jam pengelama deriba ari mengeri Miri, ngangkatka Klinik Long Lama nyadi sepital, ngaga Rumah Mesra Rakyat (RMR) di pasar Long Lama nangkup pemayuh tubuh peranak menua pesisir, ngemanahka penyikap perengka guna sekula menua pesisir baka balai, kuarters bala pengajar sereta pagar.
Iya mega minta bekal kuasa karan 24 jam nengah kuasa solar ngagai semua rumah panjai, diputar dalam timpuh ke pandak sebedau sambung grid enggau bekal ai beresi ngagai semua rumah panjai.
Ku Dennis, peranak Telang Usan terus ngeletak pengandal tinggai ngagai Tim Adenan, nama diberi niang Kepala Menteri Datuk Patinggi Tan Sri Adenan Satem lalu diatu diiring ketuai tim ke baru, Abang Johari, ke alai iya empu mega ngemeratka pemansang kandang menua pesisir nyengkaum Telang Usan.
“Kepala Menteri Abang Johari ngembuan mayuh peneleba enggau megai pangku pengawa besai sekumbang ke ngaul diri ba politik lalu iya nyadi orang ke pemadu engkeman nyadi ketuai tim enggau nengeri tu nuju tikas pemansang ke tinggi agi.
“Taja pan Telang Usan jauh ari opis indu mengeri, tang Kepala Menteri Abang Johari nadai ngasaika nya kelalu jauh laban udah ngamatka lebuh iya nemuai dua kali dalam kandang sebulan ke Telang Usan lalu tu ngayanka bala ketuai tetinggi kitai endang seiku ketuai ti ngamatka jaku iya, deka meda pemansang chakah dipejalai di nengeri tu,” ku Dennis.
Pemansang ba kandang menua pesisir amat begunaka fokus ke alai Kepala Menteri Abang Johari mega bisi nyebut iya deka meda Long San dikemansang ‘rega sentimental’, tambah mega Temenggong Datuk Lawai Jau ari Long San, bakih apai iya rambau sida bela dalam kabinet nengeri.
Lebih ari 1,500 iku begempuru ngelalu penatai Abang Johari, ke alai iya mega bejadika rumah panjai Long San.
Sekeda bala ke bisi datai Menteri Muda Pengawa Berumah enggau Pengerai Mensia Mayuh Dr Annuar Rapaee, ADUN Mulu Datuk Gerawat Gala, Kaban Parlimen (MP) Baram Anyi Ngau, bala ketuai raban bansa sereta ketuai genturung pendiau ke bukai.
Ketegal kitai ti udah mindah, kitai udah bisi rumah di mengeri, nitihka pendiau kitai ti ngidupka diri. Datuk Amar Douglas Uggah Embas Sapit Kepala Menteri Sarawak
Ku iya, raban ke mindah tu udah nyadi sebagi peranak mengeri, sebagi peranak Kuching.
“Ketegal kitai ti udah mindah, kitai udah bisi rumah di mengeri, nitihka pendiau kitai ti ngidupka diri.
“Berindik enggau nya, kitai meseti nitihka singkang pemansang bansa bukai.
“Kitai meseti nyingkang ba pengawa dagang, pelajar, pengidup sereta ke bukai,” ku iya rambau bejadi Kelab Raban Iban Sebelak (KRIS) ke diatur di sebuah hotel ditu, malam ensanus.
Iya ke mega Menteri Be- tanam Betupi Moden, Tanah Adat enggau Pemansang Kandang Menua pechaya atur numbuhka KRIS ulih nyaup ngidupka bansa Iban ke diau di mengeri.
Beambika chunto kelab Saribas, Uggah madah kelab nya (Saribas) udah nyadi ruai endur bala raban berandau lalu nusun sekeda program pemansang.
“Kitai diau diselampur Mengeri Kuching, kekadang setaun enda betemu, enti betemu pan maya bisi penusah.
“Kelab Saribas ke ditumbuh ba taun 1993 udah mujur ngempung semua ke alai atur numbuhka kelab tu udah mai pemaik,” ku iya.
Ba atur nyaup ngangkatka pengidup raban, Uggah madahka kelab Saribas udah numbuhka koperasi.
Kelimpah ari nya ku iya, kelab mega bisi muka kelas main asal baka ke kelas ngajar ngajat.
“Seiti pekara ke dikemerat iya nya sentang pekara pelajar. Tetiap taun kitai nyendia tuisyen ngambi ulih ngemansang bala anak ke besekula.
“Kitai meri insentif ngagai sida ketegal kitai ngasaika pekara pelajar nyadi bengkah pekara ke pemadu begunsa amat,” ku iya.
Ba pengerami kemari, Uggah bisi nyuaka setipikit chiri ngagai komiti KRIS ungkup taun 2017-2019.
Bela datai ADUN Engkilili Dr Johnical Rayong, ADUN Bukit Semuja John Ilus, Chairman KRIS Sylvester Rangga enggau orang bukai.