Ejensi perintah begunaka saup ngemujur program komuniti
Snowdan: NGO enggau sektor peribit patut nyaup ejensi bekaul meransang raban nembiak ba pengawa dagang
KUCHING: Gerempung ukai dikuasa perintah (NGO) enggau sektor peribit dipinta bekerejasama enggau ejensi perintah bekaul dalam nentuka pemujur sesebengkah program ngaul komuniti nyengkaum dikena meransang raban nembiak ba pengawa dagang.
Kitai ulih bekerejasama ba mayuh pekara ti ulih meri pemaik ngagai raban nembiak. Tu beguna sukung semua kitai, gawa begulai nentuka pemujur program enggau aktiviti ti ulih pulaika pemaik. Snowdan Lawan Menteri Muda Nembiak enggau Lumba
Mansutka pekara nya, Menteri Muda Nembiak enggau Lumba, Snowdan Lawan, madahka periantah nengeri seruran meransang sereta nyukung program ngaul bala komuniti.
“Kitai ulih bekerejasama ba mayuh pekara ti ulih meri pemaik ngagai raban nembiak. Tu beguna sukung semua kitai, gawa begulai nentuka pemujur program enggau aktiviti ti ulih pulaika pemaik,” ku iya lebuhka nutup Face of Flawless Borneo Programme diatur di Stadium Perpaduan di Petra Jaya ditu.
Ku Snowdan, raban nembiak meseti diperansang ngambi bagi dalam program enggau aktiviti ti ulih meransang sida rinduka aktiviti sereta nempa kapisiti nyengkaum pengawa dagang.
Ku iya, batang pekara mai raban nembiak ngaul diri ba aktiviti ke bansa nya ngam- bika sida teperansang sereta chakah ngaul diri pulaika penguntung sida empu.
“Raban nembiak meseti diperansang ngena awak sida ba aktiviti ti ulih nambahka pengelandik ba pengawa dagang lalu tu mega ulih mantaika penau sida ngiga jalai ngidupka diri,” ku iya.
Iya muji piak pengatur ti udah ngatur program nya ti nerima timbal chukup manah ari Sarawak enggau Kalimantan, Indonesia, kelebih agi sida ti ngaul diri ba pekara pemajik gamal, reka bentuk dandanan, modelling, enggau reka bentuk fesyen.
Snowdan mega ngarapka piak pengatur ulih ngatur program ke sama dudi hari lalu tau ngaul pesereta ari bagi menua ke bukai di Sarawak nentuka pengerembai industri pekara pemaik enggau reka bentuk dandanan di menua tu.
Sekeda bala bisi datai Ketuai Opis Dagang Temuai, Nembiak enggau Lumba West Kalimantan, Indonesia, SH Kartius enggau ex-Miss World Malaysia 2014, Dewi Liana Seriestha ti nyuaka perais ngagai bala pemenang.