Jamit bisi ngulu pengawa raban Islam ngintu Hari Raya Aidiladha
KAPIT: Kaban Kunsil Nengeri ( ADUN) Bukit Goram Jefferson Jamit Unyat bisi ngulu pengawa munuh chapi di Masjid Jabar An-Nur nyempulang raban pengarap Islam ti ngintu Hari Raya Aidiladha seraya makai selamat enggau minta berekat, pagi Hari Enam tu tadi.
Jamit disempulang bala ketuai raban bansa enggau ketuai opis perintah ditu, diuluka Temenggong Tan Kian Hoo.
Sekeda bala ke bukai nyengkaum Pemancha Yong Thu Fook, Penghulu Sia Shui Poh, Penghulu Wong Kie Ing, Kapitan Kong Cheak He enggau Kapitan Yap Hui Le, chairman Serakup Dayak Iban Sarawak (SADIA) Kapit, Edward Manggah sereta bala ke bukai.
Penghulu Abang Hamzah Bolhassan, Pemesai JAIS Uztaz Mohd Amair Ridhwan Abdullah, Sapit Pemesai Pelajar Kapit Uztaz Awang Saiful Awang Ahmad nguluka raban orang Islam ke bukai ngelaluka penatai Jamit enggau bala bukai
“Aku berasai lantang mega gaya pendiau di Kapit, peranak ditu ke datai ari asal penatai rama tauka jalai pengarap ti bebida ngayanka semangat 1Malaysia.
“Taja sehari tu Hari Raya Aidiladha lalu pengawa munuh lembu diatur, bela digulu raban ukai Islam.
“Tu chara ti patut kitai bekunsika pengerami begulai. Penatai bala sehari kelai pengawa bebatak asur sereta bebasaka jalai pengarap pangan diri.
“Tetiap hari besai nyadi awak ngagai kitai ngusung pangan diri negutka tanggam kaul ke bisi laban kitai sedarka pemesai guna begulai ba semua pekara – aktiviti rama enggau jalai pengarap.
“Laban kitai begulai dalam penyerakup, bala pengari rayat kitai ulih merambu mayuh agi aktiviti pemansang pulaika pemaik rayat,” ku Jamit madah ngagai pengarang berita.
Jamit bisi ngagihka belanja penyampau RM10,000 ngagai Serakup Ngintu Pengelantang Orang Islam Kapit ungkup ngintu Hari Raya Aidiladha.
Raban orang Islam ngintu Hari Raya Aidiladha kena 1 September tu tadi lalu kemari (2 September) sida ngatur pengawa munuh lembu enggau makai selamat ke semua berekat enggau pengidup ti meruan.
Taun tu, Federal Land Development Authority (FELDA) bisi meri lima iku chapi ngambika dibunuh di laman Masjib Jabar An-Nur. Pengawa munuh chapi tu dikereja beripai urung pukul 9 pagi lalu dagin iya udah diagih ngagai raban orang Islam ditu.
Penghulu Abang Hamzah Bolhassan berasai temegah ati lebuhka Jamit enggau bala bukai bisi datai ngulu pengawa sida masjid pagi kemari.
“Kami temegah endar meda Jamit enggau bala bukai bisi datai ngulu hari besai ti diintu kami. Jamit mega udah gerah jari meri belanja penyampau RM10,000 ungkup aktiviti tu.
“Kami nemu iya chukup kiruh bejalaika pangku pengawa diri tang ulih ngelimpangka jam diri ungkup kami. Penatai iya mai reti chukup besai ngagai kami.
“Kami mega meri besai terima kasih ngagai FELDA ti udah meri lima iku lembu ngambika dibunuh lalu dagin iya diagih ngagai raban orang Islam ditu.