Penembu Gerija Katolik Santa Maria asil pemeri semua piak

SERIAN: Kaban Gerija Katolik Santa Maria, Kampung Baru Mawang ditu bisi datai bebala mayuh ngulu pengawa Nyerah enggau Merekat Altar ke dipenyadika Archbishop Simon Poh, Kuching, kena 31 Ogos tu tadi.

Dalam jaku dipansutka iya, ku Poh, gerija tu reta ungkup bala komuniti lalu ukai dipenggi siku aja.

“Nya alai, kitai ngetan sereta ngemansangka gerija kitai nengah saup ari diri empu,” ku iya dalam penerang berita, kemari.

Poh ngansak mensia mayuh nyikap diri nitihka pemansang di kandang menua nya.

“Bala sida meseti ngintu pesaka sida enggau nyaga tanah nentuka sida enda nyadi kampar di menua diri.”

Iya mega minta bala apai indai nentuka bala anak sida nerima pelajar menyana ungkup pengidup dudi hari.

Ba lansa bukai, chairman pengatur, Allan Lanyeh, bisi ngelansa sekeda tipan jerita enggau pengerembai gerija nya.

Nitih ku iya, gerija tu udah dipunka semina 20 ruang bilik aja enggau ketuai sembiang ti angkunka pengawa baka Daniel Kuntang enggau Sylvester Matai.

“Bala sida besembiang di chapel digaga dalam taun 1978. Diatu penyampau tubuh manggai ngagai 82 ruang bilik enggau begunan batu endur besembiang.

“Begunan gerija beungkus RM300,000 digaga asil berekat Tuhan tauka pemeri mayuh piak nyengkaum geran perintah ari pengari rayat, pemeri sida tu jauh tauka semak sereta peranak menua nya empu,” ku iya.

Ku Daniel, perengka guna di gerija tu deka nangkup peminta di Kpg Bunga, Kpg Taee enggau Salcra.

Pia mega ku iya, gerija tu agi begunaka bantu dikena ngaga tiang loching, pagar jenila, pagar enggau dinding penekat.