Niang Lans Koperal Valentino Mesa mujur ditumbak ba pendam Saratok Memorial Hill
SARATOK: Beris ujan baka ke ngelai penyinu ati bini, apai indai, diri menyadi sereta kaban belayan maya nganjung niang Lans Koperal Valentino Mesa ngagai pendam Saratok Memorial Hill, Bukit Perabun, Saratok, pagi kemari.
Niang dibai ari rumah panjai sida ba Rumah Maing, Lubok Besai, Entaih Entabai, Julau urung pukul 5 pagi kemari lalu datai ba pendam nya urung pukul 9 pagi.
Bela datai mantaika penyinu maya tu iya nya Kaban Parlimen Saratok ti mega Kaban Kunsil Nengeri (ADUN) Pakan Tan Sri William Mawan Ikom enggau ADUN Meluan Rolland Duat Jubin sereta ex-chalun Barisan Nasional (BN) Kilat Beriak.
Pengawa nganjung niang tu diintu enggau chukup basa ari raban Polis DiRaja Malaysia (PDRM) ti betuaika pengari Komisioner Polis Sarawak Supt. James Jonathan Kepala Polis Pelilih (KPD), Saratok DSP Mordani Tanin, KPD Julau DSP Bidol Noyeng, KPD Meradong DSP Hafifi Mohd Salim enggau KPD Kanowit DSP Daniel Des- mond Benjamin.
Maya pengawa tu, James nyuaka Jalur Gemilang ngagai bini niang, Rossie Beti seraya dikemataka apai niang Mesa Ugong enggau bala kaban belayan ke bukai.
Ngenang pemanah niang maya agi begulai menya, Barau Masam, madahka iya ukai semina sama sekula ba SMK Pakan tang kala sama kelas maya Pom 4 enggau Pom 5 (2004/2005) nemu bendar gaya ulah niang.
Maya Pom 6 suba ku iya, iya enggau niang bela besekula di SMK Bandar Bintangor, Bintangor.
“Bisi sekali kaban kami (Clement Mathew) maya kami begulai suba sakit, ba pementas enggau penyiru niang iya sanggup ngema kaban kami nya tadi ngelawa endur diau.
“Pia mega, basa niang enggau pengajar mega manah.
“Maya nyengai niang ba rumah panjai, laban niang endang orang ke manah ba bala pengajar dia bisi bala pengajar bela datai enggau nyengai niang,” pia ku iya maya berandau enggau pengarang berita, kemari.
Barau madah, iya enggau bala bakih sama sekula ke bukai bela datai maya nyengai niang.
Tang taja pan baka nya, Clement ti mega endang beambu madi enggau niang enda ulih datai enggau nyengai laban ke benung gawa di Semenanjung Malaysia.
Bela berasai sinu ngenang pemidang niang ti bangat lengkas baka nya, Anuerin Antau Jelenggai ti sama sekelas enggau niang ari Pom 1 nyentuk Pom 5 di SMK Pakan madahka iya enda ngadang penusah baka nya nuntung niang iya ti orang ke siru sereta semampai ensuruk maya bejaku enggau orang bukai.
“Iya mayuh bakih laban iya orang ti kemerah lalu semampai betundi enggau bala bakih.
“Ketegal nya, kami berasai sinu amat maya ngenang ulah niang,” ku iya sambil madah iya enggau niang suah betemu sereta berandau laban ke sama bela gawa di Semenanjung.
Antau madah, kepenudi seduai betemu bulan seiti tadi.
Maya nampung Pom 6, niang besekula di SMK Bandar Bintangor.
Ba ditu, iya berupai bendar ngembuan pengerindu ba pengawa polis alai iya nyadi seiku ari raban Kadet Polis sekula nya.
Niang, 29, ditemu bebadi ketegal ditimbak ari semak sereta dipantap ba Balai Polis Pingiran Subang Jaya, Kuala Lumpur pukul 3.25 dinihari kena 31 Ogos tu tadi.