Perintah Nengeri dikearap nerima reti jaku PM, PG
Pekara tu deka dikeaum dalam minggu tu begulai enggau piak Majlis Adat Istiadat, ku Uggah
KUCHING: Penanggul bekait enggau reti leka jaku Pemakai Menua enggau Pulau Galau dikearap ulih diterima Perintah Nengeri lalu pekara tu deka dikeaum dalam kandang minggu tu.
Sapit Kepala Menteri Datuk Amar Douglas Uggah Embas madahka, enti nitih, sida iya patut baum kemari ( Hari Satu) tang laban kemisi, haribulan ke baru deka ditetap dalam kandang minggu tu.
“Kami patut baum seharitu, tang laban seharitu (kemari) kemisi, nyadi haribulan baru deka ditetapka dalam kandang minggu tu.
“Aum tu diatur begulai enggau piak Majlis Adat Istidat ( MAIS), lalu kami udah bisi komiti kami empu, ke sama betuaika opis Kepala MAIS Datu Ganie Ugey.
“Pengudah baum enggau MAIS, baru kami deka mantaika iya ngagai Kepala Menteri (Datuk Amar Abang Johari Tun Openg) ngambika pekara bekait enggau PM enggau PG ulih diperundingka enggau manah,” ku iya.
Uggah madah munyi tu pengudah bejadika Konvokesyen ke-12 Institut Betanam Betupi Sarawak sereta Mungkal Program Setipikit Pengelandik Malaysia (SKM) dalam pekara bekait enggau utai ke ditanam di Palan Bertauliah di Institut Betenam Betupi Sarawak (IPS) di Semonggok ditu, kemari.
Ba tanya ari pengarang berita enti iya empu bisi macham timbal mensia mayuh pasal PM enggau PG tauka pasal nganu perintah bekait enggau pekara tu,di media rama, ku Uggah:
“Bisi aku macha timbal tu ari media rama. Orang ke mantaika penemu sida iya dia bisi hak ba penemu sida iya empu. Komiti kami enggau naka ulih ngereja pengawa kami enggau manah, taja pan pekara tu enda tau enda diputarka enggau bejimat.
“Kami ba komiti besemaya pekara tu tentu bisi chara ngemutarka iya,” ku iya lalu nandu, komiti tu sigi udah dipungkal, ke mansik pasal PG enggau PM, lalu komiti mega diarika genao pupu raban bansa asal menua tu.
Sebedau tu dalam bulan Jun (7 Jun 2017) tu tadi, Uggah ti mega nyadi Menteri Pengawa Betanam Betupi Moden, Tanah Adat enggau Pemansang menua Pesisir madahka pemerat ku iya, siti salin leka jaku ke ulih diterima semua, laban dalam kes kort kediatu, luyar ngena reti tauka penemu leka jaku PM enggau PG nya nyerumba adat orang kelia ‘setengah hari pejalai ari rumah panjai’ nya ke dikumbai reti PM, tang sekeda etnik bukai enda setuju enggau reti leka jaku nya.
“Dalam dunya ke moden diatu, ‘setengah hari pejalai ari rumah panjai’ tau disalah salin, laban kitai diatu mayuh teknologi moden ke dikena kitai mindah jampat.
“Aku ngarapka mensia mayuh, komuniti nemu reti bakani ku pengawa tu mansik pasal PM sereta PG tu pekara ke berat, silik sereta enda muntang deka dikemutar bansa nya aja, tang aku pechaya kitai bisi chara ngemutarka pekara tu ke ulih diterima ulih komuniti kitai,” ku iya.
Uggah mega ngarapka pekara tu ulih dikemutar enggau lengkas, laban Kepala Menteri udah ngaga pekara tu nyadi pemerat lalu enda tau enda dikemutar enggau jampat.
Pengudah baum enggau MAIS, baru kami deka mantaika iya ngagai Kepala Menteri (Datuk Amar Abang Johari Tun Openg) ngambika pekara bekait enggau PM enggau PG ulih diperundingka enggau manah. Datuk Amar Douglas Uggah Embas Sapit Kepala Menteri Sarawak