Uggah: Sarawak begunaka mayuh juruteknik teknikal betanam betupi
KUCHING: Institut Betanam Betupi Sarawak (IPS) dikearap ulih mansik baru silibus pelajar ba kus ke diambi bala nembiak ba palan nya ngambika seraris enggau teknologi ke diguna ba pengawa betanam betupi, ku Sapit Kepala Menteri, Datuk Amar Douglas Uggah Embas.
Jeman diatu udah berubah lalu mayuh ngena perengka guna teknologi dikena nambahka asil betanam betupi, ku iya.
“Kitai begunaka mayuh juruteknik teknikal ba pengawa betanam betupi.
“Nya alai, bisi pemerat silibus pelajar nya diubah baru . Nyema kus kediatu, timpuh ngambiska pelajar nyangka mangai dua taun, tang nitih silibus baru engka ulih digaga dalam timpuh ke lebih panjai.
“Ambika banding dua taun belajar pemun lalu setaun agi belajar nyadi pakar betanam betupi,” ku iya.
Iya madah munyi nya lebuh dirandau pengudah bejadika Konvo0kesyen ke-12 Institut Betanam Betupi Sarawak sereta bejadika Program Setipikit Pengelandik Malaysia (SKM) dalam pekara bekait enggau utai ke ditanam di Palan Bertauliah di Institut Pertanian Sarawak (IPS) di Semenggo ditu, kemari.
Pemisi digital enggau ‘Internet of Thing (IOT)’ ke sama diangkatka dalam industri betenam betupi majak nyadi pengawa ke dikerindu lalu ngarapka pengawa betanam betupi ngena chara digital sereta IOT deka matak mayuh agi bala nembiak masuk industri tu, ku iya.
“Dalam Aum Kunsil Nengeri bedau lama tu tadi, aku bisi nyebut pasal man- sik baru kus ke bisi diajar di IPS ditu, iya nya ari iya diajar dalam kandang dua taun, tang silibus baru deka dikena, nyangka timpuh nya ulih disambung ari dua taun ngagai tiga taun (Extension Programme tauka EP).
“EP tu benung digaga, laban naka kediatu, kitai semina bisi ‘EP’ ke meri jaku lalau ngagai sida ke betanam betupi di menua pesisir ulih ‘ Extension Officers’ kami ke dikarapka nemu pasal semua pekara, tang mayuh agi ‘Extension Officers’ ke napi penanggul meri jaku lalau ke profesional.
“Aku benung ngasuh IPS beratika baru silabus sida iya, ngelatih mayuh agi nembiak tenikal, nya kebuah aku ngumbai nya ‘juru teknik teknikal’.
“Ambika chunto, seiku orag bumai deka nemu pasal bakani deka nyaga pun rian ke ditanam iya. Kitai pan enda kiruh agi deka begigaka pakar laban kitai bisi juru teknik teknikal ke landik madah ngagai orang nya,” ku iya.
Iya madahka orang ke bisi peneleba teknikal nemu pasal pengawa betanam betupi ari A sampai Z, nama bansa igi penyakit ke nyerang utai tanam kitai, bakani ku kitai deka maja utai tanam kitai, ni bagi baja ke manah kena nanam buah rian, kelebih agi bansa tanah.
Pengujung iya, kitai deka meda sigi bisi orang ke pakar dalam pengelandik sida iya empu, lalu tu pan nyengkaum jelu ke ditupi sereta pengawa berikan.
Enti kitai beratika kebun bedandang besai ku iya, tu meh pengawa sida iya, juru teknik teknikal betanam betupi ke landik ngajar pekebun mit.
Enti orang nya bisi 50 iku chapi, baka ni deka nambah anak chapi nya dalam timpuh ke ditetapka. Perintah Nengeri mega begunaka orang ke bepengelandik dalam bekebun sayur.
“Tu ke dikumbai juru teknik teknikal dalam pengawa betanam betupi, ke dikarapka kitai ulih mansitka silabus baru di IPS, nyengkaum setipikit pengelandik,” ku iya ke ngarapka orang teknikal bansa tu ulih ‘turun padang’ mantu orang betanam betupi ngemoden sereta nambah produktiviti sida iya.
Nyema IPS ulih ngubah silibus nya ila, Institut Pemansik Pengawa Betanam Betupi deka nyukung IPS.
Ba pengawa nya kemari, urung 98 graduan nerima setipikit sida iya ke udah nembuka pelajar sida iya dalam kus bekait enggau betanam betupi ke sessi 2015-2017.
Sama bisi enggau ngulu atur pengawa nya kemari, Direktor Opis Betanam Betupi, Lai Kui Fong.