Penumbuh stesyen chas entukar elektrik mayuh meri pemaik
KUCHING: Atur numbuhka stesyen chas entukar lektrik MBW i-Wallbox ti keterubah di Malaysia Timur deka meri empas manah ngagai mensia mayuh.
Sapit Kepala Menteri, Datuk Amar Awang Tengah Ali Hassan madah, Malaysia diatu keran ngelaku pengawa nguna injin beresi ba perengka pengangkut.
Perengka pengangkut moto mengkang nyadi perengka ti suah ngeruga tikas pemanah agin kelebih agi dalam kandang mengeri.
Ketegal nya, perintah ku iya udah ngadu mayuh bengkah chara dikena mutarka pemar tu.
“Pengawa ke digaga Kenbest Sdn Bhd enggau Regas Premium Auto ti udah numbuhka stesyen chas tu nerima timbal manah ari mensia mayuh.
“Enggau nya, mayuh agi orang deka ulih ngempu entukar hibrid jemah ila,’ku iya nengah teks jaku rambau pengawa bejadi stesyen ngechas BMW i-Wallbox di CityOne Megamall ditu, kemari.
Teks jaku Awang Tengah dibacha Menteri Muda Jalai Kandang Tebing Tasik, Datuk Julaihi Narawi.
Awang Tengah ke mega Menteri Pemansang Industri enggau Orang Dagang madah atur numbuhka stesyen nya ngena enggau maya lalu seiti atur ke manah ti udah digaga kededua kompeni.
Atur nya ku iya seraris enggau tuju perintah di deka ngurangka keruga tikas pengamah angin sereya ngurangka pemansut karbon.
Di Sarawak ku iya, penyampau 267,992 entuka baru dirijista ba Opis Pengangkut Darat(JPJ) ari taun 2014 nyentuk ngagai bulan Jun 2017.
Ari bulan Januari nyentuk ngagai Jun taun tu, JPJ ku iya ngerijista 41,859 entuka lalu ari penyampau nya 13,465 entukar, motosikal (16,357) ke alai bas, teksi sereta perengka pengangkut bukai ba penyampau 12,037.
Penyampau tu deka majak nambah lalu kitai nyadang keruga ikas pengamah angin pan deka nambah.
“Kerejasama Kenbest enggau Regas Premium Auto chukup positif sehari tu nengah atur numbuhka stesyen chas lektrik pechuma,ke nyadi atur ngurangka pemansut karbon sereta ngurangka guna petrol.
“Kitai ngarap sida deka majak ngelaku elemen gadung ba projek ke bukai jemah ila lalu nyaup ngurangka pengamah angin,”ku iya.
Ngenang kaul ke sama, Julaihi ba jaku iya ngarap kompeni ulih berundingka atur numbuh stesyen chas ke sama ba sepemanjai jalai Pan Borneo enggau jalai kandang tebing tasik pengudah kededua projek tembu jemah ila.
Bela datai CEO Kumpulan Syarikat Regas, Tay Hong Ming, Ketuai Atur kaul Penyambung BMW Malaysia, Sashi Ambi, Direktor Pengatur Kenbest Sdn Bhd, Stephen Long, Direktor Eksekutif CityOne Megamall, Brandon Lo enggau orang bukai.