Pengerami Hari Pengada TYT diatur ba ‘Dataran Perayaan’ kena 9 Sept
KUCHING: Pengerami ngintu Hari Pengada Tuai Pemegai Menua ( TYT) Tun Pehin Sri Abdul Taib Mahmud taun tu keterubah iya deka diatur ba ‘Dataran Perayaan’ di Jalai Stadium Petra Jaya kena 9 September.
Pengerami nya ila mungkur enam bengkah pengawa lalu deka dipungkal enggau Pengawa Gempuru Sampi kena ka 8 september.
Sapit Kepala Menteri ke nyadi menteri megai tanggungpengawa pengerami taun tu, Datuk Amar Awang Tengah Ali Hassan madah Tun Taib enggau bini iya, Toh Puan Datuk Patinggi Ragad Kurdi Taib deka datai pukul 6.30 lemai.
Pengawa Gempuru Sampi nya mega deka digulu Kepala Menteri Datuk Amar Abang Johari Tun Openg enggau bini iya, Datin Amar Dato Juma’ani Tun Tuanku Bujang.
Ku Awang Tengah ba aum pengarang berita kemari, pengawa bejalai bebala mayuh deka diadu kena 9 September di ‘ Dataran Perayaan’ berengkah pukul 8 pagi.
“Urung 4,000 iku orang ti ngarika ijinsi perintah, kompeni, gerempung ke ukai dikuasa perintah, unit unifom enggau bala nembiak deka ngulu pengawa nya,’ku Awang Tengah.
Iya nambah, tembu pengawa bejalai bebala mayuh di ‘Dataran Perayaan’, TYT deka ngejang ke Komplek Dewan Undangan Nengeri( DUN) ke alai iya deka nyuaka tanda pangkat enggau midul ngagai penerima.
Muakka malam hari ke sama ku Awang Tengah, Tun Pehin Sri Taib enggau bini sereta Abang Johari enggau bini deka ngulu Makai Lemai Nengeri ti diatur di Komplek DUN.
“Ba malam nya mega, panggau pemerindang deka dibuka urung pukul 7.30 lemai di Dataran Perayaan ungkup mensia mayuh. Kitai bisi ngundang mayuh penanyi tebilang,”ku iya.
Kena 10 September, TYT deka ngulu Pengawa Ngirup Teh ba Hotel Waterfront lalu ba pengawa nya iya deka nyuaka pemeri ngagai 200 iku orang ke kurang benasit.
Nitihka Awang Tengah, pengerami taun tu diintu berebak enggau pengerami ngintu Hari Pengada Yang Dipertuan Agong, Sultan Muhammad V.
Bela datai Menteri Muda Pengangkut Datuk Dr Jerip Susil, Menteri Muda Pemansang Tanah Adat Datuk Roland Sagah enggau Menetri Muda Pekara UndangUndang, Kaul Perintah Nengeri enggau Perintah Besai sereta Pengemata Projek Sharifah Hasidah Sayeed Aman Ghazali.