Sibu Jaya deka majak richah empas projek pemansang PBH
SIBU: Sibu Jaya nyadi palan endur ngetu ti besai di nengeri tu laban ke di tengah Jalai Besai Pan Borneo ( PBH).
Sapit Chairman Kaunsil Pelilih Menua Pesisir Sibu ( MDLBS) Kunsilor Robert Lau Hui Yew madah, iya ulih nyadi hub pengangkut ti besai di nengeri tu.
“Enggau endur ti strategik sereta di tengah Jalai Besai Pan Borneo, kandang menua nya ( Sibu Jaya) ulih nyadi palan pemadu richah sereta ditapatka mensia mayuh dalam kandang lima taun ti deka datai pengudah projek pemadu besai nengeri kitai tu tembu jemah.
“Kelimpah ari nya, perambu besai bemacham pemansang ti deka dipejalai ditu ari sekeda kompeni pemansang, deka ngerichahka agi Sibu Jaya nyapai juluk nya,” ku iya lebuh bejaku bejadika pengawa nutup Pesta Sibu Jaya di laman Komersil Sapphire East, Sibu Jaya, malam kilah ensana.
Sama bisi datai Menijar Kanan Distrepark Sdn Bhd Eddy Puah enggau bala ketuai raban bansa sereta bala bukai.
Lau madahka Sibu Jaya deka jampat mansang baka Kota Samarahan ti nyadi palan besai pelajar di nengeri tu lalu enda lama agi nyadi palan perubat besai di nengeri tu.
Ku iya, Sibu Jaya tau ditempa nyadi sebuah mengeri besai di nengeri tu.
“Aku arap endar Sibu Jaya ulih nyadi sebuah kandang menua pemadu manah di nengeri tu enggau endur sereta pemansang ti udah enggau deka dipejalai dalam timpuh 10- 15 taun deka datai,” tandu iya nyemetak.
Pia mega ku iya, Sibu Jaya begunaka sebuah stadium enggau pegung nyemerai ungkup mensia mayuh patut digaga dia dikena ngerichahka agi pemansang di kandang menua nya.
Ku Lau nerang, bisi 6,000 ruang bilik enggau penyampau tubuh manggai 30,000 iku ke diau di Sibu Jaya lalu penyampau tu deka majak nambah udah tu.
“MDLBS bisi perambu ba pemansang Sibu Jaya. Nya alai, kitai begunaka sukung ari perintah nengeri nyukung pelin pemansang kitai.
“Ukai semina Sibu Jaya aja tang mega bisi perambu ke sama dikena ngemansangka Sibu,” tandu iya baru.
Berebak enggau nya, iya meri pengaga ati ngagai ejensi pemansang di Sibu Jaya baka Perbadanan Pembangunan Perumahan ( HDC), Amcorp Properties Berhad sereta ejensi bukai ti udah bebendar ngemendangka Sibu Jaya kenyau ari 25 taun ke udah.
“Piak MDLBS deka seruran gawa rat enggau ejensi bekaul dikena ngemansangka agi Sibu Jaya nyengkaum raban orang dagang, pedaja enggau ke bukai.
“Tu nyadi pengawa begulai kitai ngenegapka agi pemansang Sibu Jaya jemah,” ku iya nambah.