Peranak Malaysia patut ngetanka penyerakup ungkup pemansang menua
KUCHING: Rayat di menua tu patut nerenakka runding ti talukka menua ungkup pemansang begulai ti ulih pulaika pengelantang semua peranak Malaysia, kelebih agi ungkup nengeri Sarawak.
Mayuh chara dikena mantaika pengeransing tiap komuniti ngagai menua tu, ambika chunto ngemeranka gaya pengidup ti mantaika ulah ulih bebatak asur enggau pangan diri ke enda ngira bida jalai pengarap sereta penatai asal.
“Kitai peranak menua tu ti endang ngembuan pupu raban bansa patut seruran ulih bebatak asur enggau pangan diri, kelebih agi sentang pekara jalai pengarap ke endang nyadi isu sensitif ke tau ngeruga penyerakup.
“Bepun ari ulah ti ulih bebatak asur enggau pangan diri, penyerakup ke endang udah bisi kenyau ari 60 taun tu deka terus diasai kitai,” pia ku jaku Stora Noel iya nya seiku staf opis perintah lebuh ditanya pengarang berita bekaul 60 taun Malaysia udah ulih megai perintah kediri rambau atur pengawa ngintu Hari Kebangsaan Renggat Nengeri Sarawak di Bintulu bedau lama.
Seiku pengari raban nembiak, iya nya Adriel Nyawai Robin, ke penatai asal ari Krangan Mong, Lubok Antu di bagi menua kedua Sarawak mega madah ke raban nembiak kemaya hari tu patut nemu tanggungpengawa sida ke paling besai, kelebih agi sentang pemansang Teknologi Pemadah enggau Komunikasyen (ICT) ti tau dikira bara dalam sekau nyema enda dikena enggau jalai ke betul.
“ICT tu nyema dikena enggau chara ti betul deka pulaika pemaik ngagai kitai semua kelebih agi ungkup raban nembiak. Pia mega nyaut peminta Kepala Menteri Datuk Amar Abang Johari Tun Openg ke minta nengeri kitai tu dibungkur polisi Ekonomi Digital, lalu ari peminta Abang Jo tu udah nyata mayuh begunaka teknologi digital ke mega ulih ngangkatka tikas pengidup sereta penatai pemisi peranak nengeri tu kelebih agi di kandang menua pesisir.
“Nya alai, enti ulih kitai patut ngemunaska ulah ti bekenaka media rama ungkup naburka berita pelesu ti enda mai penguntung ngagai nengeri sereta menua kitai ke lalu ngeruga penyerakup sereta mambarka kaul en- tara pupu bansa,” ku Adriel Nyawai.
Taja pia, dalam pengeransing kitai nyapai arus pemansang dunya nengah teknologi moden, kitai mega enda tau ngelengkaka pena- tai asal kitai ngambika enda lenyau diserunyut jeman, ku lalau seiku raban pengereja pengawa dalam kompeni peribit Freddy Albert.
“Pemansang ke diasai kitai diatu endang chukup manah, tang taja pia kitai patut negika hak sereta penatai asal kitai ngambika raban nembiak dudi hari nemu ari ni asal sida sereta nerenakka runding ti angkun ke bansa diri. Nengah chara tu mega kitai ulih nentuka penyerakup entara pupu bansa ulih ditegapka agi iya nya bepun ari kaul ti tegut dalam komuniti diri empu dulu,” pia ku iya ti penatai asal ari Mamut, Miri.
Kelimpah ari nya, piak ti bekaul mega ngembuan tanggungpengawa ti besai dikena ngatur sereta bejalaika sekeda program ti ulih nentuka runding tetiap raban bansa di menua tu enda ngati kediri tang ulih tebuka nerima semua penemu ari bansa bukai.
“Nengah program ti engkeman baka pidato, main asal sereta ke bukai ulih nentuka runding sereta juluk menua tu ti deka ngadaka raban bansa ti tebuka runding dijapai.
“Ku runding aku, mayuh mega pengawa ulih digaga sekeda piak bekaul iya nya baka ngatur pekit ngambika sida ti nyereta pekit nya ulih muka runding nerima penemu sereta mansik sekeda pekara ti pulaika pemaik semua,” ku Martin Dinil ke mega kala menggi gelar champion Pidato Jaku Iban keterubah ti diatur Utusan Borneo begulai enggau Gerempung Pemansang Jaku Iban (AEDIL).
Ba kenang ti bukai, staf perintah mega patut nentuka sida seruran ngembuan integriti sereta komitmen ti tegut bejalaika servis ngagai rayat ke mega nyadi pengari tauka mai nama perintah ngagai tiap sukut menua.
“Staf perintah iya nya mega nyadi pengari perintah bejalaika tanggungpengawa meri servis ti pemadu engkeman ngagai rayat, seraya megai nama manah perintah ba dini pan endur sida gawa.
“Pekara tu nentuka rayat ulih meri kerejasama nyukung perintah lalu mega begulai ngetanka penyerakup menua tu ti udah ditanka aki ini kitai kenyau ari suba,” pia ku Dr Mary Chalang madahka pengarang berita lebuh ti ditanya rambau pengerami Hari Kebangsaan bedau lama ke berambai jaku ‘Negaraku Sehati Sejiwa’.