Tetiap komuniti patut landik nyeliah idealogi ‘ekstremisme’

Idealogi ‘ekstremisme’ ti ditabur nengah media rama ulih ngerachun runding ke mega ulih ngeruga penyerakup

MIRI: Rayat Malaysia kelebih agi di Sarawak patut begulai ngemunaska idealogi ‘ ekstremisme’ ti dikumbai nyadi musuh penyerakup.

Menteri Muda Dagang Temuai, Seni enggau Main Asal, Datuk Lee Kim Shin madahka idealogi ‘ekstremisme’ ti ditabur rambau jeman teknologi tu patut diseliah enggau jampat.

“Kitai patut ngetanka pengelantang ke bisi lalu anang mudah tepawah enggau idealogi ‘ekstremisme’ ti nyadi musuh besai penyerakup bansa,” ku iya rambau ngintu Pengerami Hari Raya AidilAdha di Surau Darul Hijrah bedau lama.

Ku iya, ‘ekstremisme’ tau bisi ba mayuh bengkah gaya lalu komuniti patut landik ngiarka semua ideologi ti tau ngemai penyerakup runtuh.

“Kitai kelebih agi di Sarawak berasai lantang laban Sarawak nyadi nengeri teladan enggau penyerakup pupu bansa sereta tau ngintu tetiap hari besai enggau likun,” ku iya.

Kaban Kunsil Nengeri (ADUN) Piasau, Datuk Sebastian Ting mega madahka pemereti ngintu Hari Raya Aidiladha ulih nerenak penyerakup entara rayat Malaysia enggau raban orang Islam.

“Komuniti ukai Islam mega begulai enggau raban orang Islam ngerami Hari Raya Aidiladha sereta ulah meretika pengawa munuh jelu tupi mega ulih dikunsi begulai lalu ngenegapka penyerakup,” ku iya nerang.

Pia mega, penyerakup enggau pengelikun ti bisi sehari tu pekara ti chukup berega sereta patut ditan rebak ke diatu enggau dudi hari.

“Kitai mega begulai enggau raban orang Islam ngintu Raya Korban seraya ngempitka kaul kerejasama sereta ngaga pengawa beripai enggau pangan diri nadai ngira bansa,” ku iya nerang.

Ba lansa ke bukai, bisi 11 iku chapi diberi pengari rayat ngagai Kaunsil Ketuai Raban Bansa Melayu Miri (MAKMUM) ngambika dibunuh lalu diagih ngagai 10 buah genturung pendiau ti ngaul raban orang seranta, balu, anak patu balu enggau peranak genturung pendiau ti beripai netak dagin chapi nya.

Dulu agi ari nya, Surau Darul Hijrah Piasau Utara mega bisi munuh empat iku chapi lalu dagin enggau tulang nya bela diagih ngagai 56 iku penerima sereta peranak genturung pendiau.

Sama bisi datai Chairman MAKMUM, Pemancha Abang Mohamad Datuk Seri Abang Othman, Chairman Surau Darul Hijrah Piasau Utara, Ibrahim Hermanto Jepon sereta Ketuai Raban Bansa Genturung Pendiau Lembah Hijau, Adam Malek Han.

Kitai patut ngetanka pengelantang ke bisi lalu anang mudah tepawah enggau idealogi ‘ekstremisme’ ti nyadi musuh besai penyerakup bansa. Datuk Lee Kim Shin Menteri Muda Dagang Temuai, Seni enggau Main Asal