Komuniti Kayan patut pintar ngerebut peluang
Sida diperansang nyereta kus ti ngaul pengawa dagang dikena nyungkak sosio ekonomi diri: Dennis
MIRI: Komuniti Kayan patut ngambi peluang ke bisi dikena nyungkak sosio ekonomi sida enggau ngambi kus ti ulih ngaul sida ba dagang.
Kaban Kunsil Nengeri (ADUN) Telang Usan Dennis Ngau madah pengelandik ti diulih nengah program tu ulih nyadi peransang dalam pengawa dagang.
Ku iya, pedagang ngembuan tanggung pengawa beguna endar dalam nyaup ngenegapka ekonomi nengeri kelimpah nentuka pengidup komuniti ti menyana agi dudi hari.
“Komuniti Kayan meseti pintar ngerebut peluang nyadi orang ti bepenemu sereta landik. Sida meda patut ngembuan runding dunya ngambika ulih nyulut agi.
“Ngagai sida ti enda mujur ngerebut peluang, puntan dalam pengidup. Sida ti mujur iya ke ulih meda peluang ba semua pekara lalu sida ke dulu agi ngerebut,” ku iya madah rambau pengawa nutup program pemansang eknomi ungkup kus ruang bilik enggau karnival bejual ungkup produk ari betanam betupi sebengkah hotel ditu kena lemai Hari Minggu tu tadi.
Program tiga hari diatur Serakup Doh Kayan Telang Usan (DKTU) bekerejasama enggau Opis Betanam Betupi (DOA).
Ku Dennis, tu program chukup manah dipejalai DKTU enggau DOA ba pengawa ngadaka pelaung enggau betukar penemu ekonomi antara kaban komuniti.
“Kitai patut ulih besemekih sereta ngerebut peluang disediaka perintah besai enggau nengeri ngambika nyadi sebagi ari komuniti dinamik seraris enggau tikas ekonomi ti jampat mansang.
“Kitai mega patut ngempit agi pemanah kaul, kitai chukup dikelala enggau basa, ba semua renggat pejalai pemansang produk,” ku iya.
Dennis mega meri jamin ngagai bala komuniti ke alai sektor betanam betupi di nengeri tu manah.
“Opis Menteri Betanam Betupi Moden, Tanah Adat enggau Pemansang Kandang Menua ti diketuaika ketuai enggau mayuh penemu ti manah ba chara ngemansangka sektor betanam betupi di nengeri tu, iya nya Sapit kepala Menteri Datuk Amar Douglas Uggah Embas.
“Sida ti bisi ati ngaul diri dalam sektor betanam betupi, kelebih agi ari kandang menua pesisir, enda ibuh irau laban kami diatu bisi bantu ari iya lalu kitai meseti bisi pengandal tinggi gawa begulai ba pengarap nyungkak industri betanam betupi,” ku Dennis.
Iya mega ngarapka mayuh agi program ke bansa nya deka diatur jemah, dikearap ulih nempa mayuh agi orang dagang nyulut ari komuniti Orang Ulu, kelebih agi bansa Kayan.
“Aku berasai lantang meda kitai mujur ngumpul belanja nyauka manggai RM50,000 ari karnival bejual tu, lalu aku pechaya nyema kitai terus ngatur program ke bansa tu, kitai deka ulih nambahka agi penatai pemisi enggau ngenegapka ekonomi,” ku iya nambah.
Dennis mega meransang bala kaban komuniti ngaul diri dalam ekonomi digital sereta bekenaka pelasar digital nyapai enggau ngena peluang ba pengulih ekonomi kemaya hari.
“Kepala Menteri kitai endang keran deka ngadaka infrastruktur Teknologi Pemadah enggau Arus Penyambung (ICT) kelas dunya ungkup rayat, nya alai kitai meseti ngena peluang tu ngambika chakah agi ngaul diri dalam bidang dagang enggau ngena perengka guna tu nyual produk kitai.
“Aku mega bisi merambu ngagai perintah nengeri ngadaka palan ngumpul di Long Lama ngambika produk kitai ari kandang menua pesisir ulih dieksport ngagai endur bukai,” ku iya.
Beserimbai enggau karnival bejual nya, bisi mega diatur pengawa ngelancharka ‘Bup Berapi Pemakai Asal Kayan’ ba atur nutup iya.
Bup berambaika jaku ‘Buhup Dapi Kayan’ dikeluarka Serakup DKTU Miri ti mandangka 34 resepi ti betul, manah enggau nyamai, ke alai ari pemakai asal bansa Kayan di rumah panjai.
Ba lansa bukai, Dennis ngansak komuniti Kayan di Pelilih Miri bekerejasama enggau Serakup Kayan Sarawak ( PKS) bejalaika banchi pasal komuniti ke diau di mengeri.
“Renggat keterubah banchi dipejalai kandang beberapa bulan ke udah mandangka bisi 5,000 iku aja bansa Kayan diau di mengeri. Tang aku pechaya bisi mayuh agi ke diau di sekeda rumah panjai enggau genturung pendiau di ulu Baram.
“Nya alai, kitai deka neruska pengawa banchi tu ba renggat kedua enda lama da agi. Aku ngarapka semua bansa Kayan ke diau di Miri deka nyukung sereta nyereta dalam pengawa banchi tu laban nadai tuju bukai kelimpah ari nguntungka komuniti Kayan,” ku iya nambah.
Sama bisi datai ex-ADUN Telang Usan, Senator Datuk Lihan Jok, Penulung Direktor Opis Betabam Betupi Sarawak Magdalene Lungan Ajang enggau bala bukai.
Kitai patut ulih besemekih sereta ngerebut peluang disediaka perintah besai enggau nengeri ngambika nyadi sebagi ari komuniti dinamik seraris enggau tikas ekonomi ti jampat mansang. Dennis Ngau ADUN Telang Usan