Mayuh pemansang ulih dikemujur enti rayat Lanang nyukung BN
KUCHING: Kaban Kunsil Nengeri (ADUN) Dudong Datuk Tiong Thai King meransang peranak Lanang patut nyukung chalun Barisan Nasional (BN) ba Pengawa Bepilih Besai (PRU) ke deka datai ngambi mayuh agi pemansang ulih dikemujur.
Tiong minta mensia mayuh meri sukung penuh ngagai chalun ulih menang Parti Bersatu Rayat (UPP) sitak Parlimen Lanang Andew Ting nyema iya dipilih ngarika Barisan Nasional (BN) ba pengawa bepilih besai (PRU) ke deka datai.
Nitihku iya, nyema Andrew menang ngarika BN dia deka mayuh agi pemansang ulih dikemujur ungkup sitak Lanang enggau Dudong berindik ari agih belanja besai ke dipegulai.
“Mayuh agi pemansang ulih dikemujur ungkup sitak Lanang nyema iya dimenang pengari BN.
“Nengah agih belanja ke besai enti dipegulai nya deka mantu ngemujurka mayuh projek pemansang ba sitak Dudong enggau Lanang,” ku iya rambau pejalai ngabas Rumah Dumin, Assan Tengah ke bela digulu Andrew Ting, apin lama ke udah.
Tuju pejalai ngagai rumah panjai nya dikena nerangka pasal Langgur Pemansang Sibu 1.0 ngagai peranak menua pesisir.
Ba penemuai nya mega, Tiong besemaya deka meri agih belanja RM150,000 ngagai Rumah Dumin ungkup taun baru.
Berebak enggau nya, Tuai Rumah Dumin ngarika sida serumah meri terima kasih besai ngagai Tiong laban berupai ransing ngereja pengawa sereta ngungkupka agih belanja ke guna pemansang rumah panjai nya.
Sama bisi datai sekeda raban Nembiak UPP diuluka Ketuai Bumiputera UPP Lanang Sobri Sandom.