UPP Pampang Batang Ai mujur ngatur Pengerami Hari Kebangsaan 2017
LUBOK ANTU: Pampang baru Parti Rakyat Bersatu (UPP) Batang Ai udah ngatur pengerami ngintu Hari Kebangsaan 2017 ba Balai Mayuh Guna Rumah Ngali Lingoh, Wong Pandak, Lubok Antu apin lama ke udah.
Pengerami keterubah iya diatur pampang parti nya ti baru nudukka diri di Batang Ai mujur ngempuru urung 100 iku temuai ari Wong Pandak sereta kandang besemak kelebih agi bala kaban baru UPP.
Nitih ku pengatur ke mega Chairman UPP Batang Ai Jimbat Bang, piak sida berasai tepantup ati taja program sida digaga rumpas aja tang timbal bala kaban UPP enggau komuniti besemak Wong Pandak endang manah.
“Terima kasih ngagai semua ke bisi datai, taja nadai bala temuai dipebasa datai, tang pemayuh tubuh kaban baru UPP enggau bala bukai chukup ngelantangka ati,” ku iya.
Ku iya, naka diatu, kaban UPP Batang Ai udah manggai 1,000 iku lalu dipelaba deka nambah berindik ari piak sida agi nerima peminta nyadi kaban kelebih agi sida ti nadai nyemilik sebarang parti sebedau tu.
“Aku melabaka tagit kami 1,300 iku ulih dijapai beratika sida ke datai ngambi pom nyemilik parti tu lalu tu dipeda manah endar ngagai UPP enggau Barisan Nasional (BN),” ku iya.
“Tebal agi kaban baru datai ari sida ti nadai parti, pengundi atas pagar kelimpah penyukung parti ‘lawan’ ti rinduka pengawa ditegi UPP, ngemeranka pengelurus dalam atur kereja parti sereta ngemeratka pengelantang rayat,” ku iya nyemetak.
Ngelansa pasal pengerami ngintu Hari Kebangsaan 2017, Jimbat madahka parti bejalaika inisiatif ngintu pengerami nya berindik ari hari nya bisi penyelai ba ati rayat Sarawak enggau mega Malaysia.
“Kitai pechaya pengawa ngintu Hari Kebangsaan serak tu nyadi pelasar pemadu manah kami ngayanka diri ba mua mensia mayuh kelimpah nerenakka penyerakup enggau pemanah tanggam kaul pangan diri sereta peranak di bagi menua tu,” ku iya.
Ku iya, pengudah tu sida merambu ngatur pengawa ngintu taun baru begulai enggau bala kaban UPP Batang Ai ke alai endur ngatur program deka dipadah pengudah berandau enggau piak pengatur pengawa tetinggi parti.
Sama bisi datai bala tuai rumah, kaunsilor enggau komuniti diau besemak Wong Pandak.