29 iku pesereta mujur ngulu kus nanam chabi di Lachau
ENGKILILI: Bisi 29 iku orang indu nyengkaum 25 iku kaban KUIB ari Skim Skrang, tiga iku ari Remabong, lalu seiku pengajar ari Samarahan, udah ngulu kus nanam Grasichili (chabi) ke diatur ba Rh Peter, Rapak Penyau, semak Pasar Lachau, Sri Aman, ensanus.
Kus tu dipelanja Kaban Kunsil Nengeri ( ADUN) Engkilili Dr Johnichal Rayong Ngipa, ti deka meda bala kaban Kelab Pedagang Indu (KUIB) Skim Skrang, mujur ba pengawa nanam chabi.
Munir @ Ashim Grasichili, pengempu kebun chabi tu udah meri licha sereta nunjukka sida bekaul enggau semua chara nanam chabi enggau ngintu chabi baka ti udah digaga ba kebun iya empu.
Naka diatu, iya udah nanam 1,000 pun chabi ti mungkur sesuku ikar tanah, lalu 1,000 agi paung chabi bedau ditanam. Iya merambu deka nanam mayuh agi chabi ti mungkur empat ikar pemesai tanah ti dikemisi iya.
Nyema diintu memanah, ku Munir, chabi ulih maju nyadi dagang ti nguntung. Ba tetiap 1,000 chabi ditanam, iya bulih asil antara RM8,000 ngagai RM16,000.
Ku Munir, buah chabi bisi ngembuan peminta tinggi ba makit, kelebih agi ari makit besai enggau restauran. Nya alai iya meransang bala kaban KUIB neladan pengawa iya.
KUIB Skrang begempung enggau Amanah Ikhtiar Malaysia (AIM) Betong ti mantu sereta ngiring bala kaban KUIB dalam dagang sida.
Bela bisi nyempulang bala kaban KUIB Skrang ngagai taba Grasicili nyengkaum Penghulu Betok Tubi enggau Kaunsilor Bangkong Mawing sereta Penyanding Penemu Skrang KUIB Nancy Rangkong.