Ketuai komuniti patut ngembuan ulah ti manah
Tu ulih nyadi teladan ngagai nembiak redak dipegai sida ngambika pemansang senang dipejalai
SRI AMAN: Bala ketuai raban bansa di renggat keterubah baka tuai rumah, ketuai genturung pendiau, penghulu, kunsilor enggau chairman Komiti Pemansang Enggau Pengelikun Genturung Pendiau (JKKK) sekali agi ditangkan nyadi teladan pemadu manah ngagai nembiak redak sida.
Sapit Menteri Dalam Menua, Datuk Masir Kujat madah bala ketuai raban bansa nyengkaum di rumah panjai enggau genturung pendiau patut ngembuan ulah ti manah ngambika nyadi teladan ngagai nembiak redak sida.
“Nyema sida nadai ngembuan ulah ti manah, tentu deka ditunda lalu tu tau ngemaruhka runding sida.
“Pemanah ulah bala ketuai raban bansa endang beguna endar laban tu deka ditunda sida,” ku iya.
Iya ke mega Kaban Parlimen (MP) Sri Aman mansutka jaku nya lebuhka bejaku bejadika Program Pemesai Begulai Enggau Rayat di Rumah Edward Manchu, Muding Asal semak ditu, kilah ensana.
Ku iya, sekeda ari chunto pemanah ulah seiku ketuai raban bansa iya nya ngiring sereta ngembing nembiak redak terus nyukung perin- tah kelebih agi lebuh maya pengawa bepilih.
“Tu tanggungpengawa kita nyadi ketuai raban bansa, meri penerang ngagai nembiak redak kita bekaul enggau polisi perintah sereta terus nyukung perintah Barisan Nasional ( BN),” ku iya.
Berebak enggau nya, nyadi seiku ketuai raban bansa ku iya, sida patut ngembuan runding ti positif sebedau ngaga sekeda pengawa laban pengawa ngasut tauka ngerachun runding nembiak redak nyukung penyakal nya semina pengawa masau hari.
“Nyema kita nyukung penyakal reti iya kita ngeng- gaika semua polisi pemansang ke dipejalaika perintah BN,” tandu iya.
Nya alai ku iya, sukung tegap rayat ngagai perintah BN endang dikearap kelebih agi datai ba pengawa bepilih ngambika pemansang chakah agi dipejalai di nengeri tu.
Sama bisi datai Pemesai Khas Masir, Edmund Pirang, Tuai Rumah Achang ari Kampung Muding sereta bala ketuai raban bansa ke bukai.
Berebak enggau nya, Masir mega bisi nyuaka geran perintah penyampau RM30,000 ngagai Tuai Rumah Achang ari Muding.
Masir mega bisi ngagihka geran perintah penyampau RM30,000 ungkup JKKK Rumah Edward Manchu, Muding Asal enggau RM 5,000 ngagai Serakup Indu rumah nya ungkup taun 2018 dikena bejalaika aktiviti semanjai taun sida.
Nyema sida nadai ngembuan ulah ti manah, tentu deka ditunda lalu tu tau ngemaruhka runding sida. Datuk Masir Kujat Sapit Menteri Dalam Menua