JKKK patut numbuhka wang turu pelajar ungkup pengelantang nembiak
SRI AMAN: Menteri Muda Pengelantang Komuniti Sarawak, Datuk Francis Harden Hollis dekaka tetiap kaban Komiti Pemansang enggau Pengelikun Genturung Pendiau ( JKKK) ba tetiap rumah panjai di nengeri tu numbuhka seiti wang turu khas pelajar ungkup bala anak sida.
Nitih ku iya, pengawa numbuhka wang turu pelajar nya dikena mantu bala anak kitai ba tetiap rumah panjai ti nyulut dalam pelajar ke deka nyambung peajar sida ngagai sebarang Palan Pelajar Tinggi (IPT) di nengeri kitai tu.
Nengah pemisi wang turu pelajar tu, ukai semina deka meri penguntung ngagai bala anak kitai di rumah panjai ke deka nampung pelajar sida, tang mega meri penguntung ngagai rumah panjai nya empu nyema sida mujur jemah.
Bala anak ke udah mujur asil bantu wang turu pelajar tu ila deka mai pemansang sereta ubah ngagai rumah panjai kitai nyema sida udah mujur ba pelajar sida dudi hari,” ku iya.
Iya ke mega Kaban Kunsil nengeri (ADUN) Simanggang madah munyi nya lebuh bejaku bejadika Pengerami Makai Lemai Ngintu Genap Taun ke-20 JKKK enggau Biro Indu Taman Sentosa Indah, Sri Aman bepalan di sebuah palan pemakai tebilang ditu, kilah ensana.
Berindik ari nya, iya mega mesan kaban JKKK ngambika enda ngerunding penumbuh wang turu khas pelajar tu semina deka meri pengelantang ngagai ruang bilik anak sida ti mujur aja tang enda meri penguntung ngagai peranak rumah panjai ke bukai.
Aku deka ngelalau peranak rumah panjai ngambika enda ngembuan pikir ti baka nya, laban bala anak ke ngena wang turu pelajar nya ila ukai semina ruang bilik sida aja ti lantang tang mega kitai semua enda nemu nyangka ba maya ti deka datai ila nyangka uchu kitai mega sama bisi peluang ngena wang turu pelajar nya jemah.
“Nya alai, pemujur bala anak kitai ngena wang turu pelajar tu ila iya nya pemujur kitai semua ukai semina meri penguntung ngagai seiti ruang bilik aja, tang ngagai genap peranak rumah panjai ke bukai,” ku iya nyemetak.
Kelimpah ari nya, Harden mega minta semua kaban JKKK ba negeri tu patut seruran ibuhka pekara pelajar bala anak sida.
Ku iya, udah nyadi tanggungpengawa JKKK ngambi nerangka ngagai bala komiti sida bekaul pemerat nyediaka pelajar ti pemadu manah ngagai anak sida kelimpah ari meri pemerat ngagai pekara pemansang ke bukai.
Dalam pengawa kitai nyikap diri nganti penatai taun 2020, bala anak kitai patut disikap enggau mayuh macham penemu laban nyema sida enda ngirai diri enggau mayuh penemu, sida deka tinggal dalam arus pelajar menua,” ku iya nambah.
Ku iya nambah, menua tu endang randaka orang ke ngembuan penemu sereta pengelandik ti tinggi dikena ngemansangka nengeri tu jemah ila sereta ba taun 2020 ila, tetiap ruang bilik dikerapka ulih abis nadai ngadaka seiku graduet.
Nyema kitai enggai nganjung anak kitai besekula, bakani gaya pengidup bala anak kitai ba taun 2020 ila?
Udah tentu sida deka tinggal ari ngasaika arus pemansang menua,” ku iya nandu.
Sama bisi datai Chairman JKKK Taman Perumahan nya, Terance Ajit Kana, bala kaban JKKK sereta bala bukai.
Nangkan nya, Harden mega bisi ngemendarka agih belanja perintah ungkup 2018 penyampau RM4,000 ngagai JKKK sereta RM3,000 da agi ngagai Biro Indu dikena bejalaika aktiviti ninting taun sida.
Beserimbai enggau nya, Harden mega bisi nyuaka insentid pelajar nyulut ngagai bala anak kaban JKKK ti mujur dalam peresa perintah.