Pemberita ukai tanggungpengawa muntang
SIBU: Pengawa nyadi pengarang berita ukai semina ngelengkaka dulu pengingin ati tang mega bejalai jauh sereta tau bendar ngeruga pengelikun diri ketegal ngiga pun enggau pengamat berita.
Kaban Opis Kaunsil Menua Pesisir Sibu (SRDC) Kunsilor Teo Boon Siew madah, pengawa nyadi pengarang berita suah bendar dipadahka tebilang ketegal ti begulai, berandau enggau orang pemesai.
Kelimpah ari nya, pengarang berita mega semampai nemu bagi sejarah, dikelala sereta dipebasa orang.
“Tang semua nya enda muntang baka ke disebut laban sida gawa nadai betatak jam nyengkaum bela ngaduka pengawa taja maya kemisi.
“Endur sida gawa mega enda tentu lalu bisi mega gawa ba endur ti tau ngeruga pengelikun.
“Tu enda ngengkaum sida tau disaman nyema ripot ke digaga enda betul,” pia ku iya madah.
Iya mantaika jaku nya maya bejadi Pengerami Hari Pengarang Berita ke diatur Gerempung Pengarang Berita Sibu ( SJA) ba sebuah hotel tebilang ditu, empai lama tu tadi.
Ku Teo madah, enti deka nyadi pengarang berita, sida patut ngira mayuh bengkah pekara baka ngira pengawa ke enda tentu maya.
Nambahka nya iya madah, pengawa nyadi pengarang berita mega enda mayuh kelimpah gaji enda besai keterubah gawa.
“Nya alai, kita ke udah nyadi pengarang berita meseti ngembuan ulah deka besemekih ba industri tu. Diatu bisi internet, mensia mayuh ke bukai muntang bulih berita taja pan berita ke patut ditemu amat iya nya berita ke digaga pengarang berita.
“Diatu, pengarang berita enda ulih disebut pengarang berita baka surat berita, radio tauka televisyen laban diatu sida tu meseti ngembuan pengelandik nyengkaum ba media rama,” ku iya madah.
Maya pengerami ke diatur nya, macham bengkah program bisi diatur baka belagu, nyuaka peransang pelajar enggau tikit benasit.
Sama bela datai maya tu iya nya Presiden SJA enggau Sapit iya Watt Zacchaeus enggau Earl Anek.