Jung Kuo Sdn Bhd mujur MoU enggau China, Linyi Trade City
KUCHING: Kompeni peribit ke diempu peranak menua tu, Jung Kuo Sdn Bhd udah mujur nyain sempekat pemereti ati ( MoU) ti deka bekerejasama enggau kompeni peribit ari menua China, Linyi Trade City.
Sempekat kerejasama nya disain Direktor Economic and Trade Development Bureau of Administrative Committee, Linyi Trade City, Zhuang Weiguo enggau Jung Kua Sdn Bhd ti diarika Direktor iya, Tay Chiew Hua, sereta dikemataka Sapit Kepala menteri ti mega Menteri Industri enggau Pemansang Orang Dagang, Datuk Amar Awang Tengah Ali Hassan.
Pengawa nyain sempekat nya diatur nyerumba penemuai basa delegasi dagang China Linyi ngagai Awang Tengah ba opis di Wisma Sumber Alam ditu, kemari.
Kededua kompeni nya deka bekerejasama dalam pengawa dagang iya nya ke dikumbai Malaysia-China International Trade Centre (MCITC) di Sejingkat, Jalai Bako, ditu.
Nengah MoU nya kededua piak nguji ngelakuka kerejasama enggau pemansang entara Linyi Trade City enggau MCITC ke meri penguntung ngagai orang ari menua China enggau Malaysia kelimpah ari ngempitka kaul.
Bepelasarka penerang berita Tay ari Jung Kuo Sdn Bhd, MCITC nyendiaka Palan Baum Besai sereta lebih 500 unit kedai komersial enggau industri.
“MCITC tu palan ‘onestop’ ke mayuh guna ti pemadu besai di Borneo. Juluk kami deka nyadi pengeluar ti pemadu manah ari menua China enggau pengemeran dagang mit enggau tengan pemesai bulih pengutung ari tu.
“Palan tu deka nyadi hub betukar pengelandik enggau aktiviti ekonomi entara menua China enggau Sarawak,” ku Tay.
MCITC deka dibagi ngagai tiga zon iya nya zon produk ari menua China, zon produk orang dagang mit enggau jelan pemesai menua tu empu sereta zon ketiga iya nya zon awak lapang enggau kedai pemakai.
Tay arap bendar enggau penambah penerebai terus ari enggau ngagai Kuching, deka mayuh agi orang dagang China enggau Asia datai ngagai MCITC ke lalu dikearap ulih nyungkakka industri dagang temuai.
“Kitai ngarapka palan tu deka ulih nyapai nama utai ke dikearapka sereta juluk Perintah Nengeri, ti nyengkaum dalam atur deka nyendiaka peluang gawa sereta nuju ekonomi digital.
“Kami beterima kasih ngagai perintah ke terus nyukung enggau mantu kami,” ku iya.