Lima rumah panjai di Ulu Pelagus nerima hak ngempu sistem SARES
KAPIT: Sapit Menteri Pemansang Menua Pesisir enggau Kandang Menua Datuk Alexander Nanta Linggi nyadi saksi ngemata Pengawa Nyerahka Hak Ngempu Sistem Solar Skim Bekal Kuasa Karan Menua Pesisir (SARES), Ulu Pelagus, Kapit, ke diatur di Komplek Nengeri Bletih ditu, kena pagi Hari Dua tu tadi.
SARES Kluster 1 Sungai Pelagus, Renggat Satu mai pemaik ngagai lima buah rumah panjai iya nya Rumah Majo Ulu Iran Sungai Pelagus, Rumah Jak Nanga Stabau Sungai Pelagus, Rumah Sekudan Rantau Lelenga Sungai Pelagus, Rumah George Nanga Sebunut Sungai pelagus enggau Rumah Anatu Karangan Ara Sungai Pelagus.
SARES beungkus RM8 juta meri penampak ngagai lima buah rumah panjai ti mungkur 135 pintu bilik enggau 746 iku peranak udah bulih penguntung ari skim nya.
Ba atur pengawa sehari nya, Nanta bisi nyuaka ‘Surat Aku Janji’ ngagai bala tuai rumah ti deka ngintu SARES di rumah panjai sida empu.
Bela bisi nyempulang Nanta iya nya Kaban Kunsil Nengeri (ADUN) Bukit Goram Jefferson Jamit Unyat, Residen Kapit Joseph Belayong, pemesai ngatur pengawa ari Opis Pelilih Kapit Robert Anyaw enggau Mohd Wan Shukri, Eksekutif Direktor Operasyen HELIDS PHOTOVOLTAIC Sdn Bhd Niranpal Singh, pemesai ari Opis Menteri Perengka Guna Mensia Mayuh Robert Engkiau, pemesai ari Sarawak Energy Bhd (SEB) – Christopher Wesley Ajan, Sekretari Peribit Kanan Sapit Menteri Sylvester Insor Lingan, Pemesai Pekara Khas Sapit Menteri Ambrose Abong Bugek, Pemancha Enggin Nyipa, Penghulu Daniel Dian, Penghulu Pasang Tuba, Penghulu Esit Naro sereta bala bukai.
Lebuh dikerandau pengarang berita, Nanta nerangka sistem solar diatu bisi di nengeri di baruh Strategi Tasik Biru Nasional (NBOS) Opis Menteri Perengka Guna Mensia Mayuh, kaban kunsi strategik iya nya nengeri Sarawak enggau Opis Menteri Pemansang Menua Pesisir enggau Kandang Menua (KKLW) ke alai pemansut belanja 50 peratus ari [perintah nengeri sereta 50 peratus agi ari KKLW.
Ku iya, raban renggat keterubah udah dipejalai dalam taun 2016 ba mayuh bengkah menua di serata nengeri Sarawak. Raban menua ulu ba genturung pendiau tauka rumah panjai di sitak menua ulu serap nengeri diberi sistem bekal elekterik alternatif tu.
Ambika chunto baka menua Pelagus, bisi lima buah rumah panjai di semanjai Sungai Pelagus. Lima Projek Solar ba tetiap rumah panjai ba ti udah disebut.
Ku Nanta, pekara tu endang chukup manah lalu peranak berasai lantang diau dia.
Ku iya, program SARES deka dipejalai lalu deka mayuh agi rumah panjai di menua ulu deka diberi projek ke sebaka ti mungkur mayuh agi ruang bilik, genturung pendiau tauka rumah panjai di serap menua ulu.
Kandang menua tu dipilih ti jauh di ulu lalu enti ulih enda lama agi tauka dudi hari sida ulih disambung enggau bekal elekterik grid. Kandang menua tu enda ulih dibai dalam sistem grid meri kuasa ti meruan ngagai sida nya kebuah perintah deka ngeluarka belanja besai dalam Sistem Solar ngambika per- anak rumah panjai di menua tu mega ulih ngasaika bekal elekterik 24 jam.
Ku Nanta nerang, Sistem Solar tu udah chukup manah, ukai semina meri kuasa ngagai bap, tang mega kipas, televisyen enggau mega peti ais, ba aku mai reti chukup besai laban peti ais mantu peranak ulih alai naruh pemakai lama agi lalu mantu sida ngatur jam diri ngereja pengawa ke bukai ti ngemansutka penatai pemisi.
Kebuah pia, sida enda ibuh begigaka pemakai ninting hari laban pemakai ulih ditaruh dalam peti ais beberapa hari pengelama lalu dalam kandang nya sida ulih nangkal gerah sereta pengawa ke bukai ngulihka belanja.
“Ba aku, beguna endar Sistem Solar nyadi pengubah kuing ngagai sida dalam sukut pengidup besesehari sereta mega baka ni nyikap sida enggau tikas pengidup ti menyana agi dudi hari.”