SABERKAS deka ngatur TGM kena 14 nyentuk 16 Oktober
KUCHING: Geremung Serakup Nembiak kebangsaan Sarawak (SABERKAS) deka ngatur Aum Tiga Taun Sekali (TGM) sida iya ke deka digulu urung 500 kaban SABERKAS ari serata menua Sarawak, begempuru di Kuching berengkah ari 14 ngagai 16 Oktober 2017.
Sapit Presiden SABERKAS ti mega nyadi Kaban Kunsil Nengeri ( ADUN) Tarat, Datuk Roland Sagah Wee Inn madah aum SABERKAS ti digaga kemari, nyadi aum ke penudi ke rintai eksco kediatu, sebedau TGM sida iya deka dipunka kena 15 Oktober tu ila.
Urung 62 pampang SABERKAS deka nganjung penyereta sereta pemerati sida, alai ari penyampau nya, 186 (penyereta), 148 (pemerhati) nyengkaum Eksko Nengeri tu, ke mai penyampau nya nyauka 500 ngulu TGM tu ila.
“Dalam aum kami kemari, kami bejuraika gaya penuduk wang gerempung tu, pemayuh macham atur pengawa ke udah digaga ulih SABERKAS dalam kand setaun tu ke udah.
“Entara aktiviti kami ti digaga di serata menua Sarawak digaga pampang SABERKAS di serata menua baka lumba enggau main, randau rama enggau raban SABERKAS, seretaprogram transformesyen ke bala nembiak, proram pengarap begulai enggau komuniti di genturung pendiau enggau kerejasama kompeni peribit baka Bernas ngaga program Bubur lambuk maya bulan pasa,” ku Roland.
Ba lansa bukai, iya nandu baru madahka, ba pemun aum nya kemari, alai Kepala Menteri Datuk Amar Abang Johari Tun Openg ti mega nyadi presiden SABERKAS ngelalau bala eksco sereta komiti SABERKAS, ngerintaika semua polisi Kepala Menteri ke udah dibantaika iya, nyengkaum Ekonomi Digital, pengawa betanam betupi moden (ngambika komuniti menua pesisir ulih nambah penatai pemisi sida) dibantaika ngagai semua raban SABERKAS di serata menua tu.
“Kepala Menteri mega bisi madah pasal siti pansik teknologi penyambung ke deka digaga di Long San, iya nya sebuah sitak di Telang Usan. Lalu enti projek tu mujur ila, projek tu ulih digaga di serata nengeri Sarawak,” ku iya.
Kelimpah ari nya mega, Sekretari Besai SABERKAS ti mega nyadi ADUN Pantai Damai Dr. Abdul Rahman Junaidi madah, ari bulan Ogos 2016 tu tadi, SABERKAS udah ngaga TGM di semua pampang unit nya di serata menua.
“Kami udah mujur ngaga aum TGM di ke semua 62 pampang/unit di serata menua, lalu siti ari resolusi ke dipinta bala kanban SABERKAS, iya nya, YAB Kepala Menteri/Presiden agi mengkang ulih dipadu nyadi presiden Saberkas.
“Nya alai, maya TGM 14-16 Okt tu ila, nyangka kami agi mengkang ngetanka Kepala Menteri nyadi presiden SABERKAS,” ku Dr. Abdul Rahman,lalu nandu baru madahka timpuh ke tiap eksco mangku pengawa sida iya diletakka dalam kandang 3 taun, seiku.
Ba penuduk wang SABERKAS, indu opis nya, meri RM2,000 ngagai tetiap pampang SABERKAS di serata nengeri, alai pemayuh unit sida di serata menua iya nya bisi 415 iku kaban Kelab SABERKAS ke datai ari universiti enggau kolej (bisi 5) iya nya UiTM, UNIMAS, Asia Metropolitan college, ICATS enggau Universiti Teknologi Swinburne.
“Gempung ari semua raban tu ngerikod urung 38,916 iku raban baru ari 6 unit sereta kelab, kelimpah ari kaban SABERKAS kami empu, manggai urung (ke semua) 149,916,” ku iya, lalu nandu baru madahka laban sekeda kaban SABERKAS udah nyadu kaban gerempung nya ari taun 70-an kelia.
Nitih ke rikod aktiviti ke udah digaga SABERKAS nyengkaum unit sida di serata menua tu ari bulan Ogos 2016 ngagai September 2017, udah ngaga urung 122 program di serata menua, pukul rata entara 10 ngagai 12 aktiviti sebulan.
Aktiviti mungkur lumba enggau main, pengelantang pendiau, pengelandik, (kepimpinan), program transformasi ke bala nembiak, pengawa betanam betupi sereta myauh macham aktiviti bukai, ke mayuh digaga ulih bala nembiak SABERKAS empu.
SABERKAS mega betatika pemerat penyerakup entara pupu bansa sereta pengarap, alai siti ari atur SABERKAS, iya nya 70 persin (%) ari kaban sida iya mesti nembiak ari tiap pupu bansa sereta pengarap.
Sama bisi enggau ngulu aum media nya kemari, raban pemesai SABERKAS bukai, Sapit Sekretari Besai ti mega nyadi ADUN Telang Usan, Dennis Ngau, Mandal presiden ti mega nyadi Menteri Muda Dagang Temuai, datuk Lee Kim Shin, enggau Sapit Sekretari Besai ti mega nyadi Sekretari Politik di Opis Kepala Menteri, Abu Seman Jahwie.